Chamberlain-a'n Chelsea zawm dawn

Arsenal midfielder Alex Oxlade-Chamberlain chuan Pre­mier League champion Chelsea a zawm dawn. England international manah hian club pahnihte hi pound maktaduai 35 bawr velin an inrem tawh niin khaw­thlang media te chuan an tarlang.

Kum 24 mi Chamberlain-a'n Gunners tana a contract neih lai hi tun season tawp rual hian a tawp tawh dawn a, hlawh tam zawkin Emirates Stadium-ah cham chhunzawm zel tura sawm ni mah se a hnar.

Chamberlain hian tun season-ah Gunners tan league match-ah inkhel bul a la ṭan vek a, kartawpa Liverpool an hneh loh ṭum pawh khan wing back atan hman a ni.

Gunners manager Arsene Wenger-a'n July thla mai khan a player hian club a chhuahsan loh tur thu chu 100%-a chiang a nih thu a sawi a, tuna thu thar nen chuan Wenger thusawi hi a inmil lo hle. An elpui lakah an player hma hun nei êng tak an chan ngei dawn niin a lang leh ta.

Chelsea manager Antonio Conte-a'n tun nipui transfer chhungin striker Alvaro Morata, goalkeeper Willy Caballero, defender Antonio Rudiger leh midfielder Tiemoue Bakayoko te a lalut tawh a, amaherawhchu striker Diego Costa erawh Italian manager nen an inhmuh thiam loh avangin a chhuak lo a nih pawhin a inlan tawh lo ang.

Blues an inlak belh zel lai hian London club zinga an elpui pakhat Arsenal erawh an buai zel rih dawn niin a lang. Valancia aṭanga pound mak­taduai 35 zeta an lakluh Shkodran Mustafi chuan Italian Serie A club Inter Milan a zawm dawn nia sawi a awm.