Reds-in Thomas Lemar an dawr

Liverpool chuan an club player manto ber ni turin AS Monaco midfielder Thomas Lemar dawr an tum a, French club hnenah hian August 31 hma ngeia pound maktaduai 60 chhawpchhuah an tum nia sawi a ni - he thu buatsaih a nih lai thleng chuan official-a indawrna erawh kalpui a la ni lo a, Reds-in lakluh an duh tak tak a nih chuan an chet ran a ṭul ang.

Reds manager Jurgen Klopp chuan kum 21 mi midfielder hi rei tak chhung a lo thlithlai tawh nia sawi a ni a, an lalut thei a nih pawhin midfielder Philippe Coutinho dinhmun nghawng buai lo tura ngaih a ni. Brazilian midfielder hi Barcelona chuan lakluh tumin vawi thum ngawt Reds an dawr hlawhchham tawh a, an dawrna hnuhnung ber Liverpool-in an hnar hi pound maktaduai 114 a ni.

France international Lemar hi Arsenal nen pawh sawi zawm an lo ni tawh a, mahse Gunners boss Arsene Wenger chuan an beiseina a tawp tawh thu sawiin Lemar an dawr chhunzawm loh chhan chu Monaco-in in hralhchhuah an tum tawh loh vang niin a sawi. Monaco hian nipui transfer-ah Bernardo Silva leh Benjamin Mendy chu Manchester City hnenah an kaltir tawh a, Chelsea-ah Tiemoue Bakayoko hralhin striker striker Kylian Mbappe chu Paris St-Germain-in an beisei mek bawk.

Ram tana vawi nga inlan tawh Lemar hi Liverpool hian an dawrna hmasa hnawl a nih pawhin lakluh ngei tumin an dawr dawn nia sawi a ni a, Monaco hi an ṭang zo kher ang em? tih chu zawhna awm thei tak a ni - Reds hian sum ren an tum lo.