Aizawl FC-ah PSV chhuak

Dutch club lar PSV Eindhoven-a inzir chhuak Andrei Ionescu chuan I League champion Aizawl FC a zawm.

Aizawl FC hian Thawh­ṭanni khan MPL khel tur squad an puang a, foreigner pahnih neih theihah Nigerian defender Kareem Omolaja Nurain leh Liberian midfielder Alfred Kemah Jaryan te hming an ziah lan avangin Romanian midfielder Ionescu hi Mizoram foot­ball inelna sang berah hmuh a beisei thei rih lo ang.

Ionescu hi Romanian club Universitatea Cra­iova academy-ah kum 10 chhung a inzir a, PSV-in a theihna an hmuhin an lalut a, season khat hnuah Dutch club hi chhuahsanin a inzirchhuahna Univer­sitatea Craiova-ah a let.

Romanian midfielder Ionescu hi Europe club lar Steaua Bucharest, Royal Antwerp leh Ferencvaros tan a khel tawh a, Aizawl FC a zawm hma hian FC Voluntari tan a khel a, Romanian league sang ber Liga I club a khel thei player hi kum 29 mi chauh a la ni avangin Mizo club-in beisei an nei sang khawp ang.

Aizawl FC-in Ionescu hma hian Alfred, Kareem, Afghan defender Masih Saighani, Japanese striker Yugo Kobayashi leh Ivorian forward Leonce Dodoz te an lalut tawh a, I League-a foreign player awm thei zat paruk an nei kim chiah bawk.

Mizoram Premier League Season 6 chu August 31 hian khelh ṭan a ni dawn a, I League club hian tun season match hmasa berah Ramhlun North an hmachhawn ang.