Barcelona player thar Ousmane Dembele

"Engtik niah emaw chuan Barcelona kawr ka la ha ang," titu Ousmane Dembele chu Thawhṭanni khan Nou Camp-a mipui 17,000 hmaah Barcelona kawr ha a phochhuah a ni.

Barcelona hian French forward manah hian Borussia Dort­mund hnenah pound maktaduai 96.8 an pe phawt ang a, a chet ṭhat dan a zirin a man hi pound maktaduai 135.5-ah a pung chho thei ang. Kum 20 mi Dembele hian club president Josep Maria Bartomeu hriatpuiin Thawhṭanni khan kum nga daih contract a ziak.

Khawvel footballer manto pahnihna Dembele chuan, "Mumang ram a thleng dik a ni. Khawvel club ṭha ber a, khawvela player ṭha ber te nena kan awm ho tur hi ka lawm a ni," tiin a hun tawn chungchang a sawi.

Manto 2-na

Paris St-Germain-in Barca aṭangin pound maktaduai 200-in Neymar an lalut a, Brazil captain a thiam tih phat rual ni lo mah se sum chevel hi a tam mah mahah an ngai.

Neymar man vangin Dembele man £96.8m hi a lang tlem a ni thei a, amaherawhchu he French forward aia manto chu player pakhat chiah a awm. Khawvel player ropui tiha sawi theih Cristiano Ronaldo, Zinedine Zidane, Luis Figo, Ronaldo leh Kaka te pawh Dembele aiin an man a tlawm zawk vek.

Barcelona-in sum hman tam lamah an hmelma Real Madrid an elpha ṭhin lo a, tun

ṭumah erawh Los Blancos club chungah Catalan club an leng ve ta. Heti taka sum an hman tam ngamna player Dembele hi tu nge maw a nih chiah le?

African thisen kai

Dembele pa hi Malian a ni a, a nu hi Senegalese leh Mauritian thlah a ni a, African thisen kai a ni. France khua Vernon-ah May 15, 1997 khan a piang a, naupan tet aṭangin football kaihhnawih a tui nghal.

Barcelona forward thar hian a tuina hmasa futsal a khel nasa a, amah aia kum upa bulah pawh a langsar. Amah­erawhchu, kum 13 a nihin Dembele hian football-ah insawrbing a duh avangin futsal a kalsan a, amaherawhchu futsal khel ṭhin a nih avangin ball a thiam a, a ke ding leh vei lam a hman thiam dan a inang chiah bawk.

Bul ṭanna Rennes

Kum 2010 khan Dembele hian French club Rennes a zawm a, kum 13 mi chauh a la niin a chhungte pawhin an ṭawiawm ṭha. French forward hi a nu bakah a farnu leh unaupa te pawhin an ṭawiawm ṭha a, a chenna Brit­tainy, Rennes-ah an awmpui.

Kum li hnuah Rennes re­serves team tan khelin goal a khung deuh reng a, Manchester City leh Gerard Houllier ten an enthla reng a, Liverpool manager hlui hian hetih lai hian Red Bull Salzburg tan player zawn hna a thawk.

Salzburg hian euro makta­duai 2-in senior team tan pawha la khel lo Dembele hi lak an tum a, Ligue 1 club Rennes-in hralh an phal loh avangin professional contract an zawrh hmasak ber ṭumin a hel zet a. Amaherawhchu Rennes sporting director Mikael Silvestre inrawlh hnuah French forward hi a hmin.

Manchester United defen­der hlui Silvestre chuan, "Ro­naldo-a'n Manchester United a zawmtirh kha ka hria a, Ousmane hian Cristiano nau­pan lai kha minti hre chhuak a ni. Ballon d’Or dawng thei tur khawpa theihna a nei a ni," tiin a fak.

Ligue 1-ah Dembele a che ṭha nghal a, match 26 chiah a la inlan chungin goal 12 khungin assists vawi nga a nei bawk. Hemi season hian best young player-ah thlan a ni a, he chawimawina hi Marco Verratti, Eden Hazard, Franck Ribery leh Zinedine Zidane ten an dawng tawh.

Ribery hnung zuiin

Franck Ribery hnung zuiin Germany lam a pan a, Borussia Dortmund tana league match a khelh hmasak berah Mainz an hmachhawn a. An khingpui defender Leon Balogun chuan, "Inkhelh lai khan Pierre-Emerick Aubameyang hnenah khawi aṭangin nge he rawlthar hi in lak a, a va danglam ve," tiin thiam a tih thu a sawi nghal.

Dortmund tan hian Dem­bele hian season khatna leh tawpnaah hian goal ruk khungin assists 12 a nei a, inelna dang zawng zawng nena belhkhawm chuan goal 10 khungin assists vawi 21 zet a nei pha a, theihna a nei sang tih a lang.

Chona thar

Rennes manager hlui Rol­land Courbis chuan Dortmund a zawm hma hian Barcelona sawmna a hnawl thu a sawi a, hei hi Catalan club tana khel tlak loa a la inngaih vang a ni ber.

Tunah chuan Neymar-a hmunruak hnawh khat turin Barcelona a zawm a, pressure a ngah dawn. International break a awm avangin French forward hi a la inlan rih dawn lo a, September 9 zanah Barcelona leh Espanyol te an inkhel dawn a, Barcelonian Derby hi Dembele bul ṭanna tura ngaih a ni.

Kum 20 mi Dembele chuan, "Ka tan chuan Messi bula ka khel tur ringawt pawh hi chawimawina a ni a, khawvel player ṭha ber hnen aṭang hian thil tam tak zir ka duh. Neymar nena khaikhin chi kan ni lo a, Brazil captain hi khawvel player ṭha ber zinga mi a ni. Keipawh nitin hma ka sawn zel a, Neymar thlak tura Barcelona pan ka ni lo. Kum 20 mi chauh ka ni a, zir belh tur neiin club lian hi ka zawm a ni," tiin pressure neih tlem nen Neymar thlakna a nih loh thu a sawi lang.

Footballer manto panga
2017 Neymar £200m Barcelona to Paris St-Germain
2017 Ousmane Dembele £135.5m Dortmund to Barcelona
2016 Paul Pogba £89m Juventus to Manchester United
2013 Gareth Bale £85m Tottenham Hotspur to Real Madrid
2009 Cristiano Ronaldo £80m Manchester United to Real Madrid