Liverpool leh Keita an inrem

Champions League khel tur Liverpool chuan RB Leipzig midfielder Naby Keita lalut turin German club hi inremna an neihpui a, an lakluh hun tur erawh July 2018-ah a ni thung. Keita hian Leipzig-a a contract neih­lai ang chuan nakkum nipui bazar-ah pound maktaduai 48-in a chhuak thei ang tih a ni a, Reds chuan nipui bazar awm leh tur hmasa berah heti zat pek hi an remti ta a ni.

Liverpool boss Jurgen Klopp-a'n nipui transfer bazar inhawn rualin Keita hi a rim nghal chat a, mah se Leipzig-in hralh an remti lo. Vawi hnih ngawt an dawr hlawhchham a, an dawrna hnuhnung zawk phei chu pound maktaduai 70 lai a ni. Reds-in an player duh an lalut thei dawn lo takngial nia an inhriat hnuah nakkum lam thlir lawkin hma an la ta zawk.

RB Leipzig hian season hman zawh takah khan Bundesliga-ah Bayern Munich chiah tluk loin pahnihna dinhmun an luah a, Champions League khel tur an nih avangin Keita hi zawrhlai a nih loh thu Reds hnenah hian an lo hrilh chamchi tawh ṭhin. Mahse, nak­kum atana ruahmanna nena Reds-in an dawr meuh chuan an ṭang zo ta bik lo.

Keita hian season hman zawh takah khan Leipzig tan Bundesliga match 31 khelin goal riat a khung sak a, an player pawimawh pawl a ni. Guinea international chuan, "Nakkuma Liver­pool ka zawm theihna tura thutlukna siam a ni hian minti lawm takzet a, Reds hmachhawp te hian phurna nasa tak min pe a ni," a ti.

Liverpool hian nipui transfer-ah player pathum an lalut tawh a, Mohamed Salah chu AS Roma aṭangin pound maktaduai 34-in an lalut a, pound maktaduai riat man Hull City defender Andrew Robertson leh Chelsea aṭangin Dominic Solanke an lalut bawk.