Zverev leh Cilic chak niah Ferrer a tla
Thawhṭanni zan khan tun season-a Grand Slam hnuhnung ber tur US Open chu Flushing Meadows, New York-ah khelh ṭan a ni a, mipa singles inelna huangah Alexander Zverev leh Marin Cilic ten hnehna an chan laiin seeded chang phak David Ferrer erawh a chak lo nghal.
Kum 2014 US Open champion Cilic chuan darkar hnih leh minute 47 chhungin khawtual tlangval Tennys Sandgren chu 6-4, 6-3, 3-6, 6-3 in a hneh. Croatia tlangval Cilic hian zaninah Florian Mayer a hmachhawn zui leh nghal ang.
Nimin khan rawlthar beiseiawm Alexander Zverev-a'n a match hmasa berah fiahna a paltlang. Seeded palina Zverev hian darkar hnih leh minute 49 chhung an inkhelh hnuah Darian King chu 7-6 (11-9), 7-5, 6-4 in a hneh. Set khatna bik hi darkar khat leh minute 21 chhung zet an khel a ni.
Kum 20 Zverev hi tunlai player chhuak thar zinga beiseiawm ber pawl a ni a, season hmasa khan US Open-ah hian second round a thleng. Kuminah player langsar ṭhenkhat Andy Murray, Novak Djokovic leh Stan Wawrinka te an inlan loh avangin beiseina a nei sang zual ang.
Spain tlangval Ferrer chu rin loh takin world number 102 Mikhail Kukushkin lakah 6-4, 3-6, 2-6, 1-6 in a chak lo nghal a, khawtual tlangval Jack Sock pawh 6-2, 7-6 (14-12), 1-6, 5-7, 6-4 a Jordan Thompson hneh loin a tla nghal bawk. Inkhel dangah Jo-Wilfried Tsonga leh John Isner te chuan hnehna an chang thung.