Mayweather v McGregor Sum a tam, McGregor hma hun engtin nge?

Pathianni khan khawvelin a nghahhlelh 'fight' chu phochhuahin a awm tawh a, round 10-naah Floyd Mayweather-a'n Conor McGregor a knockout a, 'boxer ropui' a ni tih a lan nawn tir.

Mahse, fight pahnih tawp hnuah pawh fighter pahnih chanchinin ngaihven a hlawh zui. Mayweather-a'n sum engzat nge a hnek chhuah? Inhnek kha a la thutak tawk lo em ni? McGregor-a'n boxing a khelh chhunzawm zel dawn em? tihte chu zawhna langsar a ni a, he fight zet hi chuan khawvel ngaihven a hlawh a ni.

Sum a tam

T-Mobile Arena-ah seat 5000 chuang zet awl mah se Mayweather chuan gate ticket aṭanga an sum lakluh ringawt hian kum 2015-a Manny Pacquiao nen an inhnek ṭuma ticket aṭanga an sum hmuh pound maktaduai 59.9 chu a khum niin a sawi. Pay-per-view aṭanga sum lut tur hi hriat la ni lo mah se inhnek aṭanga sum lut hrim hrim hian Mayweather-Pacquiao inhneka pound maktaduai 480 chu a khum tura ngaih a ni bawk.

Mayweather-a'n sum engzat chiah nge a hawn theih dawn a la chiang lo a, beiseinaah chuan pound maktaduai 232 tal chu a hlawh turah ngaih a ni - chumi awmzia chu Amercian boxer hian minute khatah pound maktaduai 7.7 zel a hlawh tihna a ni!

McGregor ve thung?

McGregor-a'n pound maktaduai 77.5 a hlawh tura ngaih a ni a, Irish fighter hian minute khat zela pound maktaduai 2.3 hlawh ang thung a ni - Mayweather phak lo viau mah se minute khata a hnekchhuah hi UFC fight-a sum tamna bera Nate Diaz nen an inhnek ṭuma a hlawh zat nen a in ang!

Heti taka sum a tam avang hian McGregor-a'n UFC aiin boxing-ah hun a hmang tam mai lo maw? tih chu zawhna a ni a, UFC president Dana White chuan, "A inhnek zel loh hi ka duhpui zawk a, thil dang fiah tur a nei tawh chuang lo," tiin a sawi. Hetihlai hian BBC Radio 5 live commentator Mike Costello chuan, "McGregor hi boxing-ah hralh a tla tlat tawh a, Paulie Malignaggi nen an inhnek pawhin a mak lo ang," a ti a, sparring-na lama McGregor nena inhmu thiam lo Paulie chuan McGregor-a la cho a rin thu a sawi.

Mayweather a 'serious' lo?

Vawi 50 inhnek a hmachhawna vawi 50 hnehna a channa ni turin Mayweather-a'n awlsam takin McGregor a hneh a, American boxer hian he fight hi a la 'serious' lo nia ngaitu an tam. World heavyweight champion hlui Lennox Lewis chuan, "Floyd khan kha inhnek kha a ngai thutak thlawt lo. Hahdam takin a awm a, a nui vel mai mai a, hlauhthawnna a nei lo a ni," a ti.

Round rukna thleng chuan Mc­Gregor-a'n Mayweather aiin vawi kuain a khingpui hi a hnek fuh hnem zawk. Mahse, boxing lam ziaktu lar Tris Dixon chuan, "Inchhuanna chi a ni lo, Mayweather khan a game-a hruai luh a tum avangin a hnek tam tir a ni," tiin Irish fighter a dah sang lo hle.

Kawng awlsam a ni lo

"Ka khingpuite darkar thum an training chuan darkar li ka training a, anni aia tam zel ka ti ṭhin," titu Mayweather chuan a zinkawng chu thil awlsam tak a nih loh thu a sawi. American boxer chuan, "Rethei taka chawilen ka ni a, kum 19 mi nia ka inhnek hmasa bera ka hlawh zat chu $100,000 cheque a ni. Kha pawisa min pek khan eng nge an sawi ka hre lo, ka duh chu pawisa kha a ni mai," a ti.

Mayweather chuan, "Boxing trainer ka ni dawn a, fighter-te puitu nih ka duh. Fighter-te hnenah hian ring chhung mai ni lo a pawn lam thlenga mite ngainat nih dan zirtir ka duh a, star ropui tak ni tur hian thawhrim a ngai em em a ni," tiin a hmachhawp a sawi.