Montpellier-in Loris Karius an duh

French Ligue 1 club Montpellier chuan Liverpool keeper Loris Karius lakluh an duh a, hetihrual hian Merseyside club erawh an la dawr lo thung. 

Kum 27 mi goalkeeper hian August 2018 khan Besiktas chu kum hnih chhung atan loan-in a zawm a, mahse kum hnih contract erawh hmang zo hman loin May khan loan-a a hun hman hi a titawp. Turkish club nen hian a tira an inrem dan chuan loan-a a khelh zawhah a ngheta zawm theihna a nei a, Reds-in a man atan pound maktaduai ruk an dawng ang - hei erawh a thleng dawn ta lo a, Montpellier hian hei aia tlawm zawk hian an beisei a rinawm. 

Karius hian kum 2016 khan German club Mainz aṭangin Liverpool hi pound maktaduai 4.7-in a zawm a, Jurgen Klopp-a'n beiseina sang tak nei mah se Champions League 2018 final-a a chetsual hnuin ngai a awh leh tawh lo. 

Champions League 2018 final-ah hian Real hmahruaina Karim Benzema-a khung chu a ball theh chhuah sual vanga lut a ni a, Gareth Bale-a goal hnihna chu a man ngheh zawh loh avangin a lut bawk. Bale-a goal hmasa zawk erawh goal ropui bik a nih avangin Karius dem theih a ni lo a, inkhel a tawp meuh chuan 3-1 in Liverpool an tlawm.