Mbappe a chhuak ang - Deschamps
France national team coach Didier Deschamps chuan AS Monaco forward Kylian Mbappe chuan club thar a neih a rin thu a sawi a, mahse Ligue 1-ah a khelh zui ngei a beisei thu a sawi tel bawk.
Season hmasa inlena hrang hranga goal 26 khungtu Mbappe hi European club lian ten an awt hle a, a bik takin Champions League nomawi kawltu Real Madrid chuan lakluh tumin hma an la nasa hle.
Deschamps chuan, "Mbappe hian club thar a zawm ang, mahse Ligue 1 a khelh chhunzawm ang," a ti. Deschamps thu sawi aṭang chuan tun hnaia Mbappe lak tumtu langsar Paris Saint-Germain hian an player duh hi an chang ngei dawn niin a lang ta.
PSG hian tun nipui transfer chhungin Barcelona forward Neymar chu pound maktaduai 200 zetin an lalut tawh a, an elpui Monaco player duhlai hi an laksak dawn a nih pawhin loan hmangin a ni tawh ang a, season tawpah pound maktaduai 160 velin an la nghet ang.
Ligue 1 champion Monaco hian season thara an league match hmsa berah Mbappe hi an khelhtir a, tun hnai an match pathumah erawh a inlan lo vek. Kartawpa Marseille 6-1 zeta an sawp ṭum khan bench lamah hun hman tluantir a ni.
Kum 18 mi Mbappe hi World Cup qualifier khel tur France tan koh a ni a, Ningani zan dar 12:15-ah Netherlands an lo mikhual dawn a ni. Dutch hmachhawn tur squad-ah hian Premier League player aṭangin Manchester United midfielder Paul Pogba, Arsenal defender Laurent Koscielny bakah a teammate Olivier Giroud leh Alexandre Lacazette te an tel bawk.