Dortmund striker thar Yarmolenko

Borussia Dortmund chuan Dynamo Kiev for­ward Andriy Yar­molenko an lalut a, a man zat puan­zar ni lo mah se pound mak­taduai 23 bawr vel ni tura ngaih niin kum li chhung atan contract an ziahpui.

Dortmund sports director Michael Zorc chuan, "Andriy hi hun rei tak chhung lakluh tumin kan lo enthla tawh a ni," tiin an striker thar chungchang a sawi a, pound maktaduai 135.5-a Barcelona lama kaltir Ousmane Dembele hmunruak luah tura an lakluh nia ngaih a ni.

Arsenal leh Everton pawhin lakluh tuma an lo dawr tawh ṭhin Yarmolenko hian Dynamo Kiev lo club dang a la nei ngai lo a, Ukrainian club tan a khelh chhungin match 341-a inlanah goal 137 khung sakin season hmasa khan match 36-ah goal 19 a khung sak.

Yarmolenko hian Kiev-ah season 11 hun a hman chhungin Ukrainian Premier League (3), Ukrainian Super Cup (4) leh Ukrainian Cup (2) a chawi a, Ukrainian Footballer of the Year-ah ṭum thum zet thlan a lo ni tawh bawk.