Shillong Lajong-ah foreign player paruk

I League club Shillong Lajong chuan ram pawn player paruk an lakluh thu an puang a, an player lakluhte hi centre forward pahnih Saihou CH Jagne leh Abdoulaye Koffi, attacking midfielder Aiman Salah Al-Hagri, defensive midfielder Daniel Odafin, centre back pahnih Lawrence Doe leh Oh Juho te an ni.

All India Football Federation chuan season thar I League lo awm turah foreign player lakluh theih zat chu parukah a tisang a, pangain starting eleven an chang thei dawn. Lajong hian a ruala paruk an lakluh avangin foreign player chu an lakluh belh thei tawh lo ang.

Tlarhmaa khel tur pahnihah kum 30 mi Saihou Jagne hian Swedish club AIK Fotboll tan khel ṭhinin Swedish league sang ber Allsvenskan, Swedish Cup leh Swedish Super Cup-ah te champion nomawi a chawi. Kum 25 mi Koffi erawh Egyptian second division-a top scorer dinhmun lo chelh tawh a ni a, Lajong a pan hma hian Saudi Professional League club Al-Khaleej tan a khel.

Midfielder pahnihah Aiman Al-Hagri hi Yemen international niin ram tan vawi 25 a inlan tawh a, Bahrain lamah league leh Cup nomawi a lo chawi tawh. Nigerian midfielder Daniel Odafin hian Lebanon lamah a hming a lo chher tawh a, 2013-14 ah khan Best Defensive Midfielder-ah hial thlan a lo ni tawh.

Lawrence Doe hi Equatorial Guinea international niin ram tan match 21 a inlan tawh a, Greece, Oman leh Saudi Arabia-ah te inkhelin hun a hmang tawh a, kum 25 mi Oh Juho hi South Korea tan age level hrang hranga lo inlan tawh niin Lajong tan player ṭangkai ni thei tura beisei a ni.