Higuain tel lohna Argentina team

World champion vawi hnih ni tawh Argentina chu nakkum Russia World Cup khel turin an din­hmun a la ṭha tawk lo. Zirtawpni zingah Uruguay an hmachhawn dawn a, manager Jorge Sampaoli-a'n player a koh zingah Juventus striker Gonzalo Higuain telh a ni lo.

South America ram 10 inel zingah Argentina hi pangana an ni mek a, palina chin hi Russia pan nghal thei tur an ni. Pangana tan playoff khelh a ngai dawn, captain Lionel Messi leh a ṭhian ten hna hautak thawh tur an la nei.

Kum 57-a upa Sam­paoli hian Messi kawppui theih tur hian Manchester City striker Sergio Aguero bakah Mauro Icardi, Paulo Dybala leh Angel di Maria te a ko.

South America aṭang hian khelh 14 aṭanga point 33 hmu thei Brazil chu an tling chiang tawh a, Argentina chungah hian Colombia (24 points), Uruguay (23) leh Chile (23) te an awm mek.