Florentino Perez-a thlansa kha, an theihnghilh e, an theihnghilh e!

Real Madrid-in an club chanchina a vawi 34-nan La Liga nomawi an chawi fel tawh a, a hnu zela sawi hlawh ber erawh khelhna chang phak lo Gareth Bale-a chanchin a ni. 

Welsh forward hi coach Zinedine Zidane nena an inkawmngeih lohzia hrilh nawn kan ngai lo a, nula an rim dun lo ang tih a chiang reng - French manager hian a chhawr duh tlat lo. Mahse, player luhlul ve tak Bale hian khelhna hmun chang lo chungin Real chhuahsan a la tum lo cheu a, a agent Jonathan Barnett chuan, "Real tana a khel thei rih lo hi a pawi a, mahse a chhuak lo ang," tiin a sawi!

Barnett-a thusawiin football khawvel a barakhaih a, Real-a Bale-a hlawh zat thlengin sawi thar a ni a, Zidane nena an buai chhoh dan thlengin chanchin ngaihnawm a tling leh ta. 

Real Madrid-a player ropui ni ṭhin Zinedine Zidane-a'n coach a nih hnuah pawh Real tan hna ropui a thawk a, La Liga (2), Champions League (3), Spanish Super Cup (2), UFEA Super Cup (2) leh FIFA Club World Cup (2) nomawi a chawi tawh. 

Zidane hi match 19 dana champion ziah ang a ni a, a ropui hle. French manager hi technical taka thlirin coach ropui tia sawi tur ni lo mah se player-te huikhawm a thiamna chu an fakna a ni a, player rilru puthmang a hriatthiam avangin team boruak ṭha tak a siam ṭhin niin an sawi. 

Gareth Bale erawhin thawnthu dang sawi tur a nei thung ang - Bale hian kum 2013 khan Tottenham Hotspur aṭangin Real hi pound maktaduai 85-in a pan a, a hunlai hian khawvela footballer manto ber a ni. Mahse, hetiang taka player theihna sang bik nei hi Zidane nen an inmil lo a, Spanish football hrechiangtu ten an zirchian ngial pawhin an buai ṭanna tak erawh sawi tur an hre bik chuang lo. 

Real president Florentino Perez hi Bale atchilhtu a ni a, Cristiano Ronaldo chhuah a phal chhan pawh Welsh forward-in a hmun ruak a luah theih a beisei vang a ni. Zidane-a ngaihdan a dang thung a, Bale hi hralh a duh. Perez leh Zidane ngaihdan a inhmu lo a, Bale chhuahtir duhtu Zidane zawk hian a puanthuah telin Santiago Bernabeu a chhuahsan. Zidane tel loin Real Madrid an kal hleithei lo a, khuang loa chai tum ang lek an ni. 

May 2018-a an chhuahtir coach hi March 2019-ah an ko kir a, Zidane-a'n Bale hralh phalna a nei tel ta thung. French manager-in season chawhnu lam chu thu pawi nei loin a hmang zo mai a, kum 2019 nipui a herchhuah meuh erawh chuan a ṭawng pawr ṭan. Texas-a pre-season tournament an neihnaah Zidane hian, "Mimal inhuatna engmah a awm lo. Naktukah chhuak se kan vaia ṭhat tlanna tur zawk a ni ang," a ti! Hetihlai hian Bale-a agent Barnett chuan Zidane hi na takin a sawisel a,  'zahpuiawm' tiin a ko. 

Bale-a'n kar khatah £600,000 zet a hlawh avangin heti zat hlawhtir ngam khawvel club-ah an awm meuh lo a, sum tamna Chinese Super League club Jiangsu Suning an lo lang. 

Chinese club hian kara khata pound maktaduai khat hlawhtir an inhuam nia sawi a ni a, mahse Real hian free transfer-a an kaltir a ngai thung. Hetiang boruak karah hian Real-in chanchin thar an hria a, khelhna hmun chang lo ve tho James Rodriguez chu pound maktaduai 36-a lei duhtu an awm. 

Pound maktaduai 36-a James an hralh theih chuan engah nge Bale chu man nei loa a chhuah bik ang? Real thuneituten a thlawna an player chhawr duh loh chhuahtir an phal lo leh thut a, a man an phut.  Thil thui tak kalpui hnua Real chet danin Jiangsu a ti thinrim a, an inbiakna an titawp nghal - call an la duh lo a, inbiaknaa tel zawng zawng an hawisan hmak. Real vanduaina belhchhah turin James lei duhtu awm anga sawi chu thu lengvak lek a lo ni bawk!

Gareth Bale-a'n Zidane hnuaiah hmun a chang dawn chuang lo tih a hria a, October khan chhuah a duh thu a sawi nawn - mahse Zidane a ngawi reng a, amah duhsaktu Perez meuh pawhin tun ṭum chu a hawisan. Kum 31 mi forward hian a tih tur a hria. Kawh mawh a bawl ṭan a, November khan Wales tana international match-a khelh zawhah a ṭhiante nen banner kengin thla an la - banner-ah hian 'Wales. Golf. Madrid. In that order'  tih a inziak a, Wales leh golf zawhah Madrid a dah tihna a ni!

La Liga season tawp lama a chet dan phei chu Spanish media chaw tui ber a tling - bench-ah a mutthlu a, lehkha zialin 'entlang' lem a siam a, professional chet dan nia mawi loin a che. Zidane-a'n a lawm lohna a lantir ve zui a, Real match hnuhnung berah chuan squad-ah pawh Bale hi a tel phak lo! French manager hian, "Technical lam thil a ni," tiin mimal inhuatna a nih loh thu a sawi a, Bale leh Zidane an insawifiah chhawk a ni ber. 

Bale hian tun season-ah Real tan inelna hrang hrangah match 20 chauh a la khel a, goal thum a khung. Mahse, Bale hi tun season aṭanga teh chi a ni lo - Spanish club tan match 251 khelin goal 105-a khung tawh a, Champions League nomawi pali leh La Liga nomawi pahnih a chawi tawh. 

Barnett-a'n rin loh takin Bale chhuah loh tur thu a sawi a, anmahni lam chuan chhuahna tur an zawng dawn lo tihna a ni. Real-in kum hnih chhungin player chhawr duh loh tan pound maktaduai 35 vel an seng leh dawn tihna a ni a, a tlem lo hle. Barnett chuan, "Gareth hian harsatna a nei lo. Madrid-a chen hi nuam a ti a, kum hnih dang cham tura contract a la neih bawk avangin khawiahmah a kal lo ang. Bale lak duh club an awm ngei a, mahse a hlawh ang zat pe thei hi an tam lo. Real tana a khel thei rih lo hi a pawi a, mahse a chhuak dawn lo," a ti!

Hetihlai hian nakkuma khelh tur Euro 2020 chu rilrua dah chungin Bale hi loan-in a chhuak tur anga sawi a awm bawk. Mahse, Barnett chuan, "Gareth hi khawvela player ṭha ber pawl a ni a, khawvela player ṭha ni phakte chu loan-in an chhuak ngai lo," tiin a sawi.

Hming    Gareth Frank Bale

Pianni leh thla    16 July 1989 (kum 31)

Pianna hmun    Cardiff, Wales

San Zawng    6 ft 1 in (1.85 m)

Playing position(s)    Winger

Real Madrid-a Bale sulhnu

Match    251

Goal    105

Assist    68

Nomawi (Real Madrid)

La Liga: 2016–17, 2019–20

Copa del Rey: 2013–14

Supercopa de España: 2017

UEFA Champions League: 2013–14, 2015–16, 2016–17, 2017–18

UEFA Super Cup: 2014, 2017

FIFA Club World Cup: 2014, 2017, 2018