Mc Dowell's No. 1 Soda Mizoram Premier League Season 6 powered by Active Pixel Vawiinah Lammualah ṭan a ni dawn

Mizorama football inelna sang ber Mizoram Premier League Season 6 chu Lammualah khelh ṭan a ni dawn ta.

Vawiin tlai dar 3:00 hian I League champion Aizawl FC leh Ramhlun North FC te an inkhel ang. Zan lamah veng lian pahnih Bethlehem Vengthlang FC leh Chanmari West FC te an inhmachhawn ang.

AFC an ṭha em?
Aizawl FC-in coach thar Paulo Menezes hnuaia an match hmasa berah Ramhlun North FC 2-1 in an hneh a, I Day Football-ah semifinal an thleng. Amaherawhchu Portuguese coach hnuaia an match hnihnaah Chanmari FC an hneh lo a, final an thleng zo lo.

AFC hian season liam taa I League nomawi an chawi hnuah team thar an din mek a, transfer lai a nih avangin foreigner an lakluh thu darh reng mah se MPL-ah chuan pahnih chauh an chhawr dawn.

Paulo Menezes hian I Day Football-a an chhawr tawh Nigerian defender Kareem Omolaja Nurain leh Liberian midfielder Alfred Kemah Jaryan te chiah MPL-ah an hmang thei dawn a, an danglamna tur chu goalkeeper thar Avilash Paul a ni.

Aizawl FC-in an match hnuhnung berah game mawi an khel a, Portuguese coach kut hnu a lang ṭan. Tunah chuan training-na hun ṭha an nei rei leh tawh a, Ramhlun North hmaah fiahin an awm ang.

Coach thar Samson
Ramhlun North-in coach thar Samson Ramengmawia hnuaiah an match hmasa ber an khel dawn a, Liberian player pahnih Dennis leh Manneh te an lalut.

Zo United coach hlui Sam­son chuan, "Registration an tihfel chuan kan foreigner te hi chhawr theih an ni dawn a, amaherawhchu vawi hnih chiah training an la neih avangin inkhel bul an ṭan lo ang," tiin an player thar chungchang a sawi.

Inkhel tur thlirin Samson chuan, "Aizawl FC nena kan inkhelh hmasak ṭum kha uluk takin kan thlir a, keini aia an chungnunna ka hmu lo. Kan hneh thei ang," tiin I League champion a hlauh loh thu a sawi.

Zanah intum tawk
Tun season-ah Bethlehem Vengthlang FC leh Chanmari West FC te an la intawng lo a, zan inkhel hi a hmuhnawm ang.

West Warrior-in Mizo midfielder lar ṭhin Lalram­luaha an lalut a, midfield-ah Shil­long Lajong midfielder hlui pahnih Ramluaha leh Jacob Lalrawngbawla te an nei dawn.

MFA Super Cup leh I Day Football-ah Chanmari West tlarhnung a phui lo a, season liam taa best defender H. Lalhlimpuia loan-in an lalut bawk. Lunglei tlangval Lalhlima hian a club hlui BVT hmachhawnin bul a ṭan ang.

Chanmari West coach HC Zarzoliana chuan, "MPL-ah chuan match hmasa ber aṭangin chak nghal a ngai a, theihtawp chhuahin chak tumin kan khel ang," tiin a sawi.

Bethlehem Vengthlang FC-in MFA Super Cup leh I Day Football-ah champion zui ta Chhinga Veng an hneh lo a, Chhingcows tih loah chuan coach Chawngthansanga hote hi season bul hmang ṭha ber an ni.

BVT secretary Lalruatfela Hmar chuan, "Season ṭan tirha kan player-te tho kan player-te an ni a, an inhre chiang tawh khawp ang. Point thum hmuh kan tum dawn," tiin Vanglaini a hrilh.

Inkhel en man Rs 30/- a ni a, school uniform ha tan inkhel en man a awm lo.