MPL lawmman a pung

Mizorama football inelna sang ber Mizoram Premier League lawmman chu season hmasa lam aiin nuai hnihin a pung.

Champion lawmman punna a sang ber a, MPL5 champion Chanmari FC-in nuai nga an dawng a, MPL6 champion chuan nuai ruk an dawng tawh ang. Nuai khat dang hi pahnih aṭanga pariatnaah sem ral a ni thung.

MPL-ah hian match neih apiangin chak zawkin Rs 3,000 an dawng ang a, a chak lo zawkin Rs 2,000 an dawng ang. An inhneh­tawk chuan Rs 2,000 ve ve pek an ni ang. Hei hian semi­final leh final a huam lo.

Best goalkeeper, best defender, best midfielder, best forward, best player leh top scorer thlan an ni ang, hei hian Rs 5,000 ṭheuh a keng tel ang. Hei bakah hian match tinah man of the match thlan ṭhin a ni ang a, cheng 1,000 an dawng ṭhin ang.

Lawmman sem ral tura belhkhawm hi cheng 20,76,000 a ni a, season hmasa khan cheng 18,76,000 semral a ni. In­khelh apiangin club pahnih ten ticket 100 ve ve a thlawn­in an dawng ang a, inkhel en na ticket hralh aṭanga sum lut 50% an insem ang a, 50% dang hi MPL Board kutah a lut thung ang.

MPL Lawmman
Category MPL6 MPL1-MPL5 Punna
Champion Rs 6,00,000 Rs 5,00,000 Rs 1,00,000
Runner Up Rs 3,30,000 Rs 3,00,000 Rs 30,000
3rd Place Rs 2,20,000 Rs 2,00,000 Rs 20,000
4th Place Rs 1,60,000 Rs 1,50,000 Rs 10,000
5th Place Rs 1,35,000 Rs 1,25,000 Rs 10,000
6th Place Rs 1,10,000 Rs 1,00,000 Rs 10,000
7th Place Rs 85,000 Rs 75,000 Rs 10,000
8th Place Rs 60,000 Rs 50,000 Rs 10,000
Fairplay Rs 20,000 Rs 20,000 -
Total Rs 17,20,000 Rs 15,20,000 Rs 2,00,000