I League club AFC an lawm
Aizawl FC-in I League atana an mamawh foreigner paruk leh coach an la tawh a, technical director Hmingthansanga chuan nomawi humhim theihna tura an hmanraw mamawh an lakluh theih avangin an lawm thu Vanglaini a hrilh.
Hmingthana chuan, "Pathian malsawmna dawngin season hmasa ṭha takin kan hmang zo a, coach leh assistant coach-in min chhuahsan bakah theihtawp a chelh beh kan tum kan player-te kan chelh thei lo. Chutihrualin coach leh player chhuak te thlakna tur kan lalut thei zel hi kan lawm khawp mai," tiin a sawi.
AFC technical director chuan sawi chhunzawmin, "Aizawl FC hi chuan foreigner quota tlem hi kan duh dan a ni reng a, mahse AIFF lamin foreigner paruk neih theih an tih tak siah chuan kan elpui Mohun Bagan leh East Bengal te thlir ran chungin foreigner lak theih zat kan hnawh khat a. Kan foreigner lak te hi kan mamawh tur nia kan hriat te an ni a, thil tam tak paltlang chunga contract kan ziahpuite an ni. Player lakna tur budget min siam sak avangin club president (Robert Romawia Royte) chungah kan lawm takzet a, season hmasa tluk phak ngei kan tum a ni," tiin champion nawn an tum thu a sawi.
Aizawl FC hian Portuguese coach Paulo Menezes an lalut a, hei bakah hian foreign player paruk Alfred Kemah Jaryan, Kareem Omolaja Nurain, Masih Saighani, Yugo Kobayashi, Leonce Dodoz leh Andrei Ionescu te an lalut tawh a ni.