MPL6 aṭangin dan thar hmang dawn
Khawvel football-a thuneitu sang ber FIFA leh India rama thuneitu sang ber AIFF ten thuchhuah an siam tawh a, MFA technical committee-in a hnuaia dan tarlante hi MPL6 aṭanga hman ṭan turin thutlukna an siam.
Dan tharte hi MPL6 ṭan a nih aṭangin Mizoram puma hman tawh tur a ni. Kick off-naah a thahtu chu opponent half-ah din phal a ni tawh dawn a, engti lam hawi zawng pawhin ball pet phal a ni. He dan hi dan thar hman tur zinga langsar a ni
Dan thar hman tur chu
Law 3 : Halftime laiin referee hrilh kher loin outfield player leh goalkeeper thlak phal a ni tawh a, yellow card offence a ni tawh lo.
Player-in referee phalna la hmasa loa field a luhin emaw inkhelh laia a lo inrawlhin direct freekick a hrem tur a ni. Team official pawhin inkhel a tibuai a nih chuan direct freekick a hrem tur a ni.
Law 4 : Goalkeeper lukhum khum hi pawm tur a ni a, phal loh zingah a tel lo.
Law 5 : Red Card/yellow card hmu khawpa player a foul a injury a awm a nih chuan field chhungah treatment pek theih a ni. Amaherawhchu a rang thei ang berin treatment pek tur a ni a, ground pawnah chhuahtir kher loin a khel chhunzawm thei a nih chuan khelhtir lehnghal tur a ni.
Law 7 : Extra time-a half time lai hian water break tawite phalsak tur a ni. MPL-ah chuan he dan hi final-ah chauh a hman theih ang.
Law 8 : Kick off-naah hian a thahtu tur hi opponent half-a din phal a ni. Kick off-ah hian eng tihawi zawng pawhin ball hi pet phal a ni.
Law 12 : Violent conduct (tharum thawh) hi direct red card tur a ni. Contact a awm emaw awm lo emaw tum ringawt pawhin direct red card chawitir tur a ni.
Law 14 : Tie Breaker-ah penalty petna lam tur zawk hi referee ten captain pahnihte awm laiin coin toss in an thlang tur a ni. MPL-ah chuan semifinal leh final-ah chauh he dan hmanna hun hi a awm ang.