Champion lai Kerber a tla nghal
US Open hmeichhe singles champion lai Angelique Kerber chu a match hmasa berah tleirawl Naomi Osaka lakah a chak lo nghal. Thawhlehni zan inkhel dangah seeded pakhatna Karolina Pliskova erawhin harsatna nei loin second round a inhlangkai thung.
Arthur Ashe Stadium, Flushing Meadows-a inkhelah German nula Kerber hi Japanese tlairawl Osaka lakah darkar khat leh minute nga chhung lekin 6-,3 6-1 in a tlawm. Kum 19 mi Osaka hian winners vawi 22 a vua a, a khingpui Kerber aiin ṭum 13 zetin a vaw chhuak hnem zawk.
Seeded parukna Kerber hian kum khat liamta khan US Open nomawi hi a chawi a, hemi hnuah inelna lianah a la champion leh tawh rih lo. Tun season French Open-ah khan first round-ah a tla nghal tawh bawk, a tan season duhawm lo tak a ni.
US Open bikah hian champion lai first round-a tla nghal player pathumna a ni, tun hmain Patrick Rafter (1999) leh Svetlana Kuznetsova (2005) te chu an champion hnu season-ah chak ni hmel hmu loin an tla nghal tawh a ni.
Kum 29 mi Kerber chuan, "Tun hma lama ka nihna leh theihna kha a la ngai reng a, ka chak lohna leh ṭhat vena lai chu a la pangngai reng. He result ṭha lo hi theihnghilhin ṭha taka inkhelh leh theih ka duh hle," tiin a sawi.
Inkhel dangah world number 1 Pliskova chuan a Grand Slam nomawi hmasa ber chawi tumin bul a ṭan fuh hle, world number 72 Magda Linette lakah unforced errors vawi 19 zet nei mah se 6-2, 6-1 in hnehna chang thei tho. Hmeichhe player langsar dang zingah French Open champion Jelena Ostapenko chuan first round a paltlang ve bawk.