September-ah AFC an lo zin dawn

Asia khawmualpuia football thuneitu sang ber Asian Football Confederation (AFC) chuan September-ah AFC official-te chu India rama league kalphung zirchiang turin an rawn tir dawn a, AFC- UEFA Affairs hotupa Alex Philips hoin an lokal ang.

AFC hruaitute hian Delhi khawpuiah AFC hotute an kawm phawt ang a, an thil rawn tih tur ber hi I League leh Indian Super League thlun zawm chungchang niin AFC hian FIFA U17 World Cup, October-a India a khelh tur a zawh hma ngeiin India rama league kalphung hi siamṭhat hman an duh.

Asia-a football hotute hian AIFF hotute an biak zawh hnuah hian I League leh ISL club hotute be turin India an fang kual leh ang a, league pahniha club hruaitute ngaihdan an khawn khawm ve phawt dawn a ni.

I League leh ISL hi ruahman lawk sa angin 2017-18 season ah chuan a hran ve vein a kal phawt dawn a, AFC-in kalphung thar ruahman a tum hi chu 2018-19 season aṭanga hman ṭan tur a ni ang.