Boxing nge UFC-in ngaihven hlawh zawk?

Las Vegas khawpuia Floyd Mayweather leh Conor McGregor an inhnek zawh hnuah zawhna tam tak a piang nghal a, boxing leh UFC hi engtiang chiaha inropui hleih nge a nih a, mipuiin khawi infiamna hi nge a ngaihven zawk? tih chu zawhna tam tak piang zinga mi a ni.

Tun hmain Evander Holy­field, Mike Tyson leh Lennox Lewis-te ho hmangin heavy­weight boxing-in khawvel mipuite ngaihven rawn a hlawh a, a hnuah Klitschko unauin heavyweight rawn luahlum ve leh mah se 'unau' an inhmachhawn duh miau loh avangin heavyweight boxing a ropui tawk lo.

Engtin zel?

Boxing a thamral dawn nia ngaih karah Mayweather leh Manny Pacquiao-ten khawvel hmaah boxing larpui turin 'heavyweight' nih kher a ngai lo tih an pholang a, boxing a nung. Mahse, Mayweather-a'n McGregor-a hneh hnuah boxing a chawlhsan tak tak tur thu a sawi a, Pacman-a'n boxing a chawlhsan zet hnuah ring chhung rap leh mah se kum 38 mi a nih tawh avangin beisei tur a tam tawh loa ngaih a ni.

Tun hnaiah UFC-in khawvel ngaihven a hlawh a, boxing ai maha a game a rothap zawk miau avangin ngaihven a hlawh viau pawh hi mak tih tur a ni hran lo. Mahse, sum tam dan a-

ṭanga teh erawhin khaikhin rual an la ni lo a, UFC tan chuan boxing chu 'Ka u' tia koh chi a la ni rih. Mahse, tuna UFC star lar bera chhal ngam McGregor ber hi kum 29 chiah a la ni a, hmeichhe lamah Ronda Rou­sey a awm bawk nen UFC hian boxing a la luahlan mai ang em? tih chu zawhna awm a ni a, heavyweight boxing lama khawvel ngaihven hlawh chho mek Anthony Joshua theihnghilh erawh a thiang lo.

PPV dinhmun

Pay Per View aṭanga chhutin boxing leh UFC a intluk tawk hle. Mayweather leh Pacquiao an inhmachhawn ṭum khan pay per view kaltlanga boxer pahnih inhnek leitu zat chu maktaduai 4.4 a ni a, hei hi UFC hnuaia fight liantham pathuma PPV lei zat belhkhawm maktaduai 4.2 aiin a tam! Tun hnaia boxing PPV hmanga pekchhuah zingah fight 13 chu PPV kaltlanga entu maktaduai khat an tling a, UFC fight zinga 13 chuan heti zat chiah hi PPV hmanga fight entu an nei bawk.

Kum 2016 bika boxing-in PPV kaltlanga entu an neih zat chu maktaduai 1.6 a ni a, UFC erawh maktaduai 8.3 a ni thung. Nikuma boxing match khat zel PPV aṭanga an en dan chhutin match khatah PPV 'buy' hi 267,000 awm ang a ni a, UFC-ah chuan fight khatah 644,000 ang zel a ni thung.

Entu lam

Boxing-in gate fee aṭanga sum an hmuh tamna ber May­weather vs Pacman-ah khan ticket aṭang ringawtin pound maktaduai 55 an lalut a, UFC lamin gate fee aṭanga sum an hmuh tamna ber UFC 205-ah khan pound maktaduai 13 an lalut thung. Boxer ve ve inhmachhawn aṭanga sum hailut hnem ber Mayweather-a'n Pacquiao a hmachhawn ṭum khan second khatah £64,000 a hlawh anga chhut a ni a, UFC fight-a sum tamna bera Nate Diaz leh McGregor a vawi hnih nan an inhnek khan a hlawh hnem zawk Irish fighter-in a hnekchhuah zat chu second khatah £1,547 a ni thung - an la inthlau vet vet hle.

Boxing chanchina a hmuna entu an tam ber ṭum chu kum 2013-a Dmitry Chudinov leh Jorge Navarro ten WBA international middleweight title an inchuh kha a ni a, a hmunah mi 170,000-in he inhnek hi an en. UFC 193 kha UFC-in entu a neih tam ber ṭum a ni thung a, a hmunah mi 56,000 in an en.

Social media

Mi lar ten social media lama thu puan nan bera an hman chu twitter a ni a, milar ten social media-ah ngaihventu an ngah tawk leh tawk loh teh nan ber twitter hi hman a ni. August 28, 2017 thleng kha chuan twitter-ah Anderson Silva chu boxing leh UFC belhkhawmah pawh follower ngah ber a ni a, mixed martial artist awm tawh zinga ropui ber tih hiala an sawi Brazilian fighter hian follower maktaduai 7.94 a nei.

Mayweather chuan Silva hi dawtin mi maktaduai 7.65 follower a nei a, McGregor chu pathumna niin maktaduai 5.94-in an follow. Mike Tyson-a'n boxing a chawlhsanna rei tawh mah se follower maktaduai 5.39 neiin palina a ni. Hmeichhe fighter zingah Ronda Rousey chu lang awmchhun niin maktaduai 3.42 follower a nei a, British boxer Amir Khan chuan follower maktaduai 2.19 a nei bawk.