Football nipui bazar a tawp dawn ; Player langsar dinhmun chiang lo an tam
European football nipui bazar chu naktuk zing dar 3:30 hian a tawp dawn. Premier League club lian ṭhenkhatin player thar lakluh an la tum a, a ṭhenkhat erawh chuan an chân ngei dawn niin a lang - Arsenal, Chelsea leh Liverpool te chu buai zual tur zinga ngaih an ni.
Premier League bikah chauh pawh nipui bazar tawp ni hian transfer liantham tak tak a thleng fo tawh - Mesut Ozil, Dimitar Berbatov, Marcos Alonso, Ashley Cole, Carlos Tevez, Claude Makelele, Hugo Lloris, Wayne Rooney leh Virgil van Dijk te chuan hetiang niah hian English club thar an zawm, zaninah pawh hian transfer lian kan hmu leh a nih pawhin a mak lo ang.
Blues tan hna a tam
Premier League champion Chelsea manager Antonio Conte-a'n an squad ti chak turin player lak an la mamawh belh thu a sawi. Italian manager hian Leicester City aṭangin N'Golo Kante a lakluh chu a hmang
ṭangkai hle. Kante-a'n Foxes tana a khelhpui ṭhin midfielder Danny Drinkwater lakluh tumin ṭum hnih an che chhuak tawh a, an la hlawhtling lo.
Kum 27 mi Drinkwater hian season hmasa ṭan dawn khan kum 2021 thleng daih contract thar ziak mah se nimin khan club chhuahsan a duh thu a sawi. Manchester United laka Nemanja Matic hralhtu Blues hian Drinkwater bakah Ross Barkley lakluh tumin thapui an thawh nawn dawn tih a chiang.
Season hmasa league match 36 a khelh aṭanga goal nga khung thei England midfielder lakluh tumin Chelsea hian Everton chu pound maktaduai 25-in an dawr a, pound maktaduai 50 beiseitu Merseyside club tan Blues dawrna hi pawm theih a la ni lo.
Manager Conte-a'n a mamawh tawh loh thu a hrilh miau avangin Diego Costa tan club thar neih a ngai. Spain international hian a club hlui Atletico Madrid lama kir a hreh lo. Mahse, La Liga club hi January thla thleng chu player thar lalut thei lo tura hrem mek an ni.
Everton manager Ronald Koeman-a'n striker an la mamawh belh thu a sawi tawh a, season hmasa Blues champion theih nana striker rinrawl Costa hi an iai lo ang tih a rin theih. Costa leh Barkley te hian an khelhna club an inthlakthleng thut a nih pawhin a mak hran lo ang.
Arsenal an buai
Arsene Wenger-a nauten season bul an ṭan fuh lo a, tun dinhmuna an buaina chu khelmual chhungah ni loin a pawn lamah zawk niin a lang. Season tawp ruala contract tawp tur zingah Alexis Sanchez leh Alex Oxlade-Chamberlain ten rimtu an nei hraw hle.
Season hmasa Arsenal tana league goal 24 khungtu Sanchez hi hlawh tam zawk hlawh turin contract thar zawrh ni mah se a hnar, tun hnaiah an elpui Manchester City chuan pound maktaduai 50 hum chungin Arsenal an dawr. Gunners-in City dawrna hi an hnawl sak a, mahse Sanchez man atan hian Raheem Sterling hming sawi rik tel a nih leh tak avangin engpawh a thleng thut thei.
London club pahnih Arsenal leh Chelsea te chu Chamberlain manah pound maktaduai 40-in an inrem a, mahse buaina dang a awm. Wing back nih duh lotu Chamberlain hian a khelhna positon duh ber midfield lai a chang dawn lo a nih chuan Blues zawm a duh lo a, amah ngaihventu pakhat Liverpool lam a awn zawk nia sawi a ni.
Reds pawh
Liverpool attacking midfielder Philippe Coutinho leh Southampton defender Virgil van Dijk ten an club chhuahsan an duh thu an tichiang tawh a, he thu buatsaih lai thleng hi chuan club thar an la nei lo. Defender Mamadou Sakho dinhmun a la chiang lo bawk.
Kum 25 mi Coutinho lakluh tumin Barcelona chuan pound makatduai 118-in Reds dawr tawh mah se hnar sak an ni. Brazil international hi tun season-ah a club tan a la inlan lo a, hliam vanga inkhel thei lo tia sawi a ni ṭhin nachungin tunah hian World Cup qualifier khel turin an ram squad-ah a awm mek. Catalan club hi sum tam zawk nen an inlar zui ngeiin a rinawm.
Jurgen Klopp nen an inhmuhthiam loh vanga khelhna hmun chang lo Mamadou Sakho chu chhuak tura ngaih a ni. Crystal Palace-in pound maktaduai 25-in Sakho hi ngam mah se Liverpool lamin pound maktaduai 30 an chhiar avangin he thu ziah lai thleng hi chuan an la inrem lo. Saints captain Van Dijk-a'n a duh ang ngei a Reds a zawm thei a nih chuan Merseyside club tlarhnungah danglamna a awm ang.