Rafa leh Roger ten second round lut

Tennis tournament zinga sum tamna ber US Open khelh mekah mipa player champion tura rinkai zinga mi Rafael Nadal leh Roger Federer ten second round an lut, player ropui pahnihte hi an chak chho zel a nih chuan semifinal-ah an inhmachhawn ang.

Thawhlehni zan khan Flushing Meadows, New York-ah ruah a sur nasat avangin Arthur Ashe Stadium chu a chung khuh a ni. World number 1 Nadal hian darkar hnih leh minute 16 chhungin Dusan Lajovic chu 7-6 (8-6), 6-2, 6-2 in a hneh.

US Open vawi hnih champion tawh Nadal hian world number 85 lakah set khatna chu tie break hmangin la hram mah se set hnu­hnung pahnihah erawh harsatna a tawk lo. Second round-ah chuan Japan tlangval Taro Daniel leh khaw­tual tlangval Tommy Paul te inkhela chak zawk a hmachhawn leh ang.

Spain tlangval Nadal hi season hmsa khan hliam vangin a inkhel tam tawk lo a, tun season-ah erawh duhthusama ṭhain clay court season a hmang thei. US Open-ah pawh hian tun hma lama a fore hand ṭha tak ang kha a lanchhuahtir leh thei a ni ngat chuan player dangte tana hmachhawn chakawm loh ber tur a ni.

Grand Slam vawi 15 champion tawh Nadal chuan, "Inkhel bul ṭan­tirh lamah kha chuan ball ka thunun viau a, chutihrualin ka khingpui kha a chetṭhat em avangin a harsa. Set khatnaah 6-6 a nih hnuin set la turin ṭha takin winner ka vaw thei a, khata ṭang khan inkhel boruak a danglam chho ta a ni," tiin a sawi. Nadal hian eng tournament-ah pawh round hmasa lam chu a harsat ṭhin thu a sawi tel bawk.

Fiahna paltlang

US Open nomawi vawi nga chawi tawh Federer-a'n first round paltlang turin set nga a khelh a ngai. Nimin inkhelah Swiss star hian American rawlthar Frances Tiafoe chu 4-6, 6-2, 6-1, 1-6, 6-4 in a hneh hram, first round paltlang tur hian darkar hnih leh minute 37 zet hun a mamawh.

Kum 19 mi Tiafoe-a'n a thahrui ṭha tak hmangin Federer a nawr ngam a, huaisen takin set hnih chu sual chhuak mah se inkhel inhnehtawk takah Federer-a'n a tawnhriat neih a hmang ṭangkai a, set hnuhnung berah a vawi ruk nan a khingpui service chhuhsakin hnehna a chang.

Grand Slam vawi 19 cham­pion tawh Federer chuan, "Ka hnungzâng na avang khan inkhel bulṭan tirh lamah hian hlauhthawnna ka nei ṭhin a, vawiinah pawh khan khatiang boruak bawk kha a ni leh. Chutih­rualin set nga inkhel turin ka inpeih tih a chiang a, fiahna ṭha leh hautak tak a ni," tiin a sawi.

Nilaini khan New York-ah ruah a sur nasat avangin mipa singles inkhel tur paruk ngawt chu inkhelh hun sawn a ni a, match kua chiah khelh zawh a ni. Hei vang hian Federer-a'n second round lama a hmachhawn tur a la chiang lo, nizan lama Blaz Kavcic leh Mikhail Youzhny te inkhela chak zawk nen an intawng leh ang.