Netherlands tan Arjen Robben

Bayern Munich winger Arjen Robben chuan World Cup qualifier khelh tur an neihah a theihna zawng zawng nena a khelh tur thu a sawi. Netherlands hian zanin dar 12:15-ah France chu World Cup qualifier khel turin an zin chilh dawn a, September 3 zanah Bulgaria an mikhual leh bawk ang.

Inhliam dam hlim Robben chuan, "100% fit turin match tam zawk khelh ka la mamawh a, mah se ram tana inlan tur ka nih avangin ka theihna zawng zawng ka pe ang," a ti. Dutch winger hian Bundesliga-a an match hmasa pahnihah Bayern tan a khel ve ve a, Bayer Leverkusen lakah bench aṭanga luhtir niin Werder Bremen lakah minute 64-naah lakchhuah a ni thung.

Kum 33 mi forward chuan sawi chhunzawmin, "Bremen laka min thlak khan ka khel thei tawh lo tawp tihna a ni lo, coach thutlukna a ni. Mahse, minute 90 khel tura mamawh ka nih pawhin theihtawp ka chhuah mai ang," tiin a hliam vanga talbuai a tum loh thu a sawi.

Robben chuan France an hneh theih a rin thu sawi nghalin, "Engtiklai pawhin a eng zawnga thil thlir ṭhin mi ka ni a, chu rilru pu chung chuan France ka pan dawn. Mi tam takin France hi team ṭha zawkah an ngai a ni mai thei a, mah se kan khingpuite ṭha zawka kan ngai a nih chuan Inah kan awm mai tur a ni," a ti!

Netherlands hi Group A-ah awm mekin pathumna an ni mek a, an chunga awm Sweden leh France chu point thumin an phak lo mek. FIFA World Cup 2017-ah Europe aṭangin team 13 an tel dawn a, Group hi A - I ah ṭhen hran niin group tina pakhatna an tling chiang ang a, pahnihna zinga a ti ṭha pariat ten playoff an khel leh ang.

Zanin Inkhel Tur
Bulgaria 12:15 AM Sweden
France 12:15 AM Netherlands
Luxembourg 12:15 AM Belarus
Hungary 12:15 AM Latvia
Portugal 12:15 AM Faroe Islands
Switzerland 12:15 AM Andorra
Cyprus 12:15 AM Bosnia-Herzegovina
Greece 12:15 AM Estonia
Belgium 12:15 AM Gibraltar