Australia lamah Mizo lifter pathum
Commonwealth Weightlifting Senior, Junior leh Youth Championship chu September 3-9 chhung hian Gold Coast, Australia-ah neih a ni dawn a, he hunah hian Mizo weightlifter pathum Lalchhanhimi, Jeremy Lalrinnunga leh Zakhuma te an inlan dawn.
Senior huanga inlan tur Khawzawl nula Chhani hian August 13 khan Melbourne a thleng tawh a, vawiin hian Jeremy leh Zakhuma ten Delhi aṭangin inelna neihna tur hmun an pan bawk ang.
SAI Mission Vengthlang aṭanga inzir chhuak Chhani hian senior level-ah gold leh silver medal pahnih a la tawh. Chhani hi March thla aṭang khan India national camp-ah awmin 75 kg chawi tura ruahman ni tawh mah se coach ten weightlifting hmeichhia weight category siam thar (48, 53, 58, 63, 69, 75, +90 kg) ah Chhani hian + 90 kg a chawi hian medal beisei san zawk avangin + 90kg huangah a inlan ang.
Mizoram Weihghtlifting Association-in kum 2011-a 'Catch them Young' an buatsaih khan SYS coach Malsawma Khiangte kaihhruaina hnuaiah Jeremy leh Zakhuma te hian bul an ṭan a, chumi hnuah Army Boys, Pune lama chhuk thlain hetah hian foreign coach Gubala, Slovakia leh Army coach Zarzokima te hnuaiah tun thlengin an inzir mek.
Govt. Complex rawlthar pahnih hian sulhnu ṭha an hnutchhiah nual tawh. Jeremy hian nikum khan Commonwealth Youth-ah gold a la a, IWF World Youth-ah silver lain national medal a dawng nual tawh bawk.
Zakhuma hi international level-ah vawi hnih a inlanna tur a ni a, training-na lamah Jeremy nen an intluk tawk viau, tun ṭumah hian medal hlawh chuak ve thei tura beisei a ni.