Milan chakna Ibrahimovic

Zlatan Ibrahimovic a la tar lo, kum chu number mai a ni tih a lantir leh ta. Swede striker hian Sassuolo lakah goal hnih khungin AC Milan chu 2-1 in hnehna a chanpui a, a club chu season thara European fooball khel phak turin kawng dikah a hruai.

Thawhlehni zan Serie A inkhel dangah Atalanta pawhin substitute Luis Muriel-a goal khat hmangin an mikhual Bologna 1-0 in an hneh ve bawk. Point 74 hmuin table-ah pahnihna dinhmun an luah, an hnuaia awm Inter Milan in an la lehpel thei thung.

Sassuolo mualah Zlatan Ibrahimovic a tlangnel, minute 19-na lekah Hakan Calhanoglu cross chu a khung - inkharkhip thlah dul hnua chak loh la nei lo Milan chu dinhmun duhawmah a dah. Minute 42-na a ni a, Sassuolo penalty hmuh chu Francesco Caputo-a'n chiang takin a khung. Milan tana match 200-na kheltu Gianluigi Donnarumma tan dan theih a ni lo. Italian goal keeper hi kum 21 mi chauh la ni mah se sulhnu a hnutchhiah tam ta hle. Chawlhlawk hma chiahin Ibra bawk a inlar leh a, chakna goal leh an goal hnihna ni bawk a khung. Second half-ah Sassuolo midfielder Mehdi Bourabia hnawhchhuah niin goal dang a lut zui lo.

Kum 38 mi Ibrahimovic-a'n nikum December thla khan Milan hi a zawm, hliam vanga buai deuh lai nei mah se a dam a nih chuan innghahna tlak a la ni. Inelna hrang hrangah match 17 khelin goal riat a khung a, a ṭhiante khung tur vawi li a siamsak bawk.

Match zawng zawnga khel tluan turin a thain a tlin tawh lo, mahse Ibra hian khelmualah hun tam zawk hman a la duh; an match hnuhnung zawka thlak a nih pawhin a lungawi lo hle, tun ṭumah erawh minute 90 chhung a khel. Ibra chuan, "Kan hma lawkah hian ni 10 chhungin match pathum khelh hmabak kan la nei, tun hi ka hman hun sawi hun a la ni lo. Hmabak kan hlen phawt ang, chumi hnuah ka awm zel dan tur pawh kan tichiang ang," a ti.