Lewy telna Barca tan Bayern an ṭha!

Barcelona-in nipui transfer-ah Champions League-a an ngam hleihtheih loh Bayern Munich striker Robert Lewandowski an la a, Lewy hoin Germany-ah feh chhuak mah se Bayern an la ngam thei chuang lo!

Thawhlehni zan khan Bayern chuan an mikhual Barca hi Champions League group stage match-ah 2-0 in an lo hneh a, Lucas Hernandez leh Leroy Sane ten goal khat ve ve an khung.

Group C inkhel dangah Inter Milan chuan 2-0 in Viktoria Plzen an hneh a, Edin Dzeko leh Denzel Dumfries ten goal khat ve ve an khung - match hmasa bera Bayern ngam lotu Inter-in last 16 luh beiseina an nei ve zel.

Barcelona ta
Nipui transfer-ah sum tam tak sengin Barca-in 'risk' an la a, an bazar nasa hle - La Liga lamah chuan match nga khelh tawhah tlawm la nei loin 'risk' an la fuh niin a lang a, mahse, Champions League-ah erawh thawnthu a danglam thei lo.

Barca hian first half an khel ṭha viau a, goal hmaah erawh an vannei tawk lo. Minute 18-na lekah Gavi chuan Lewandowski a siamsak a, striker ṭha bik tih awm renga ṭhain Lewy hian a lo dawng - mahse, keeper chauh hmachhawn chungin a thlawh over luah!

Kum 34 mi striker hian minute hnih hnu lawkah chance duhawm a nei zui - mahse, hnai set sawt aṭanga a ball tauh chu amah hrechiangtu Manuel Neuer chuan ṭha zetin a lo dansak a, Lewy-a'n a club hlui lakah goal a khung thei lo.

A pu chhantu
Bayern-in Bundesliga-a an match hnuhnung pathumah an khingpui an inhnehtawkpui vek. Barca lakah hian tlawm ta ngat se, coach Julian Nagelsmann ban thu kan hriatna chance a sang hle.

Mahse, first half-ah Neuer-a'n a pu a chhanhim a, Germany no.1 hian first half-a Lewy a dan bakah midfielder Gavi khung ngei tura lang a dansakte chu keeper ṭha mi lo tan chuan tih chi a ni lo.

Kum 35 mi Nagelsmann pawhin result ṭha neih a duh tawh tih thutlukna huaisenthlak hmangin a tilang a, Stuggart nen an inhnehtawk ṭuma penalty chawitu Matthijs de Ligt chu bench-ah a dah a, Lucas Hernandez-a'n bul a ṭan.

Hei le Bayern
Barca-in first half an thunun miau avangin Nagelsmann fak theih a ni lo a, Barca player che rang tak karah an talbuai a, ball an chanin a hmawr bawk dan tur an haih chham ṭhin tih a lang bawk.

Second half-ah Leon Goretzka luhtirin Nagelsmann-a'n midfield thunun a tum a, minute 50-naah goal an khung ta nge nge - an goal khung dan erawh set-piece aṭangin a ni a, Bayern game fak chiam theih a ni lo.

Joshua Kimmich-a corner aṭanga ball kal chu Hernandez chuan amah vengtu Marcos Alonso tlanpelin goal-ah a tauh a, Barca goalkeeper Marc-Andre ter Stegen-a'n a dang thei lo a, 1-0 a ni.

Lawm a kim lo
Bayern an phur laklawh - goal an khung aṭanga minute lina lekah goal dang an khung chhunzawm a, 'team goal' a ni. Tlarhnung aṭanga ball an inpek kual hnuah Jamal Musiala chuan ball a tlan luhpui a, Sane tan ṭha zetin a siamsak.

Manchester City winger hlui hian ṭha zetin a lalut ve zui a, amah vengtu Jules Kounde tlanpel chungin, mawi zetin Ter Stegen-a venah a khung - goal dang a lut tawh lo.

Mahse, Nagelsmann tan lawm a kim lo - goal khungtu Sane hi minute 10 chauh a la awm tihah a la chhuak a, German winger hian khelmual pawnah thlak a nih avanga a lungawi lohna a lantir nasa hle.

Bayern nena kan danglamna chu, anni chuan goal hmaah khawngaihna an lantir ve lo hi a ni. Result khan inkhel dinhmun dik tak a hrilhfiah lo a, mahse, hei hi Champions League a ni tlat. Chance kan hloh chuan kan tuar ṭhin a, kan tifuh tawk lo. Kan tan chuan hei hi hnungtawlhna a ni. - Xavi, Barca boss

First half-ah keini aiin Barca an ṭha zawk a, a hmawr kan bawk fuh tawk ṭhin lo. Mahse, second half-ah kan insiamṭha a, kan hun neih kan chhawr thiamna khan danglamna a thlen a ni. - Julian Nagelsmann, Bayern coach