Liverpool an insiamṭha; an chak

Champions League-a an match hmasa berah Liverpool-in 4-1 ngawtin Napoli an ngam lo a, Reds manager Jurgen Klopp chuan, "Anfield ka pan hnua kan khelh chhiat ber a ni," tiin a sawi hial.

Mahse, Thawhlehni zanah Liverpool an insiamṭha nghal a, an mikhual Ajax chu 2-1 in an hneh. Reds tan Mohamed Salah leh Joel Matip ten goal khat ve ve an khung a, Ajax tana Mohammed Kudus goal khungin awmzia a nei phak lo.

Liverpool boss Jurgen Klopp chuan, "Napoli leh Ajax laka kan inkhel pahnih hi dah dun ta ila, football ve ve a ni tih pawh hriat a har zawk hial ang. Bul ṭan dan, a laihawl, a tawp khar dan, khelh dan, tlarhnung ven dan, engkim kha a danglam a ni. Kan huaisen dan, nawr dan, duh dan, engkim mai kha a ṭha zawk vek a ni," a ti a, hma an sawn thu a sawi.

A hming Salah
Liverpool tan inkhel ṭan aṭanga minute 17-na lekah Salah chuan goal hmahruai a khung a, Liverpool tan CL-a a goal 34-na niin Diogo Jota siamsak a ni - Reds thawm a ṭha a, Anfield-ah awlsam taka an chak mai rinna a lian hman hle.

Mahse, Ajax-in ngaihdan dang an nei. Dutch team hian huaisen taka khelin, Anfield-ah goal khung an tum ngam a, goal an chhuah aṭanga minute 10-na lekah Ghana forward Kudus chuan si phurh a sut - goal ṭha bik a ni a, Alisson tan dan ngaihna a awm lo.

Chutihrual chuan right back Trent Alexander-Arnold-a'n goal luh danah a tih tur a ti tawk lo tiin a sawi theih. Team pahnih hi an inhnehtawk mai dawn niin a lang tawh a, Anfield a reh - mahse, hun tawp nan minute khat chiah a awm tawh tihah Joel Matip chuan si phurh sutna goal a tauh lut a, corner aṭanga Konstantinos Tsimikas ball thlawh luh aṭanga a khung a ni.

Hma an sawn
Liverpool tlarhnungin nghin chang a la nei reng a, chak tur pawhin minute 89 an nghah thlen a ngai. Mahse, chutihrual chuan he team hian tun hnai an result chhia aṭangin insiamṭhat an ṭan tih erawh hmuh hmaih rual a ni lo.

Hliam vanga chawl reng Matip, Jota leh Thiago Alcantara ten bul an ṭan leh thei ta chu Liverpool fans tan hmuh nuam a tling a, tlarhnung laiah Matip-a awm leh tak avangin Virgil van Dijk thla a muang ta sawt tih a lang.

Matip hian ṭum dang ang thoin tlarhnung aṭanga ball khalh chhuah a ngah a, Joe Gomez-a neih loh a neih chu 'set-piece' a a hlauhawmna chu a ni bawk.

Danglamna
Spanish midfielder Thiago a awm tak avangin Liverpool midfield-in awmzia a nei ṭan a, a ṭul ang zela game pawt muang/rang thei midfielder hian inkhel a tihmuhnawm takzet.

Liverpool hi an vanneih zan ni se, goal tam zawk khung thei an ni - Darwin Nunez chuan uiawm takin chance duhawm a hlah a, Salah-a pet Calvin Bassey-a'n a lo dan per chuan post a per a, VVD tauh goal ngei tura ngaih Ajax keeper Remko Pasveer-a lo dan pawh pui tak a ni.

Reds squad an kim ṭan avangin Klopp-a'n bench aṭangin Roberto Firmino leh Nunez te a la luhtir thei a, Merseyside club-in an mangchhia an nghilh ṭan e.