Vawiin chhun dar 12-ah chak mamawh FC Bethlehem Vs Chanmari FC

Zote Honda MPL9-ah vawiin chhun dar 12:00 hian vawi hnih champion tawh Chanmari FC leh kai thar FC Bethlehem te RG Stadium-ah an inkhel dawn.

Team pahnih hi an match hnuhnungah an chak lo ve ve a, chak mamawh team an nih avangin an inkhel tur hi a pawimawh hle.

Chanmari hian Electric Veng 1-0 a an hneh hnuah Chhinga Veng 2-0 in an hneh lo. Rochhingpuia leh a hote hian 'open play'-ah goal an la khung lo a, an goal bawh a na tawk lo bawk. Bethlehem lakah Chanmari hian insiamṭhat an tum a, chu tak chu en châkawm chu a ni.

Chanmari hian tlarhmaah MPL Under 18 best forward Lalnunzira an kawl a, Santosh Trophy hnuhnung bera Mizoram striker Lalhriatpuia an kawl bawk.

Hriata hian Chennai League-ah Swaraj FC tan match kuaah goal riat a khung thei a, Inter Village 2022-ah khan Republic Veng tan match ngaah goal kua a khung bawk. MPL9-ah Zira leh Hriata ten goal an la khung lo - MPL chu a harsa ṭhin!

FC Bethlehemin striker hming langsar kawl lo mah se goal li an khung tawh thung a, ARC aṭanga an lak Isak Vanlalruatkima chu a thahrui avangin defender tan hnawksak a tling - a club hlui Chanmari a hmachhawn dawn.

Team pahnih hi an player neih dan aṭanga teh chuan an inthlau a, an khelh tawh chinah erawh an inthlau lo - chak tur rin thiam a har hle.

ROUND 3 - RG Stadium
September 15, Ningani
FC Bethlehem 12:00 PM Chanmari FC
Mizoram Police FC 3:00 PM Chawnpui FC

September 16, Zirtawpni
FC Venghnuai 12:00 PM Chhinga Veng FC
Aizawl FC 3:00 PM Electric Veng FC