Coach BS-a khingpui tur coach Sanga

Vawiin tlai dar 3:00 hian RG Stadium-ah Mizoram Police FC leh Chawnpui FC te an inkhel dawn. Police hi coach Lalbiaksanga Colney enkawl an ni a, Chanawpui hi coach Lalsangzuala Hmar enkawl an ni thung. Coach sulhnu nei ṭha pahnih enkawl an nih avangin Zote Honda MPL9 inkhel hi a hmuhnawm ang.

Police-in MPL ṭan hnuah nomawi chawi an harsat. BS-a Colney hoin tun ṭum I Day Football-ah khan nomawi an chawi a, I Day Football 2012 hnua nomawi an chawi leh hmasak ber a ni. Police hian an la ban phak ngai loh MPL nomawi lâk ngei tumin ṭan an la a, Chawnpui hi fiahna ṭha tak an ni thei ang.

Chawnpui hian MPL nomawi an la chawi bik lo a, champion rinkai pawh an ni ngai lo. Tun ṭumah erawh MPL-a Chhinga Veng leh Chanmari champion pui tawhtu coach Sanga'n a enkawl avangin en liam theih an ni ta lo.

Sanga hian squad ṭha ber nei lo mah se tlarhmaah MPL-a tawnhriat nei ṭha MC Malsawmzuala, Lalliansanga (Notea) leh Lalsawmzela te a kawl a, midfield-ah David Lalrinmuana neiin tlarhnungah Lalrinchhana Tochhawng te an awm. Rawlthar duhawm Laltlanzova (Zozoa) an la nei bawk a, an squad hian belhchian a dawl hle.

Chutihrualin Police hi an hming aṭanga thlir chuan player nei ṭha ber lawrlak an ni a, amaherawhchu an player ṭhenkhat kum te a upat ve tawh avangin hming aṭanga teh ngawt chu a fuh bik lo.

Chawnpui lakah Police hi chak tura rinkai zawk chu an ni ngei dawn a, amaherawhchu an khelh tawhna aṭanga teh chuan intum tawk tur an ni thung - a hmuhnawm ang.