Carlos Alcaraz chanchin sawi an bang thei lo

A coach Juan Carlos Ferrero chuan Roger Federer nen a khaikhin a, mi ṭhenkhat chuan Rafael Nadal nen an lo khaikhin ve bawk. Tennis star thar Carlos Alcaraz chanchinin ngaihven a hlawh takzet a, engtiang takin nge tennis khawvel a awp theih ang tih chu an inrinsiak mek.

Kum 19 mi Alcaraz hian US Open nomawi a chawi a ni satliah lo, world ranking chhuak tharah pakhatna a ni bawk. A kum a la naupang a, theihna a nei sangin a puitling tawh si, a laka beisei an nei sang pawh hi a mak hran lo.

Tu nge Alcaraz?
Murcia, Alcaraz-ah a piang a, a pianna chhungkua leh hmunin a zir bawk a, naupan lai aṭangin tennis a khel nghal - a pa Carlos hi tennis academy-ah Director a ni. Chhungkuain tennis an ngaina, inchhung khur titi luahtu pawimawh a ni bawk.

Kum 2018 mai kha a la ni, French Open champion leh world number 1 pawh lo ni tawh Juan Carlos Ferrero-a academy enkawlah a inzir a, tun thlengin Carlos Ferrero nen hian an thawk dun chhunzawm - an la thawk dun zel pawhin a rinawm.

Puitling turin hun a mamawh rei lo. Kum 16 mi chauh a nih lai, February, 2020 khan Rio Open a khel - mipa tennis inelna ATP huanga main draw a luh hmasak ber a ni, a match hmasa berah tawnhriat nei ṭha Albert Ramos Vinolas a hneh, khawvelin a hriat ṭanna a ni.

Kum duhawm
Brazil khawpuia ATP tour match hmasa bera hnehna a chan aṭangin, tuna Grand Slam nomawi a chawi inkar hi kum hnih leh a chanve chauh a ni a, season hmasa khan rawlthar ṭha zual inelna Next Gen ATP Finals-ah a lo champion daih tawh.

Nikum tawp lam khan world ranking sang zual 20 zingah a tel tawh a, Rio Open title a lak khan ATP 500 event champion thei naupang ber a ni bawk. Tun season bikah pawh Miami Open champion thei naupang ber nihna a hauh leh tawh bawk.

Grand Slam hmasa pathumah ṭha takin khel mah se final a thleng zo ngai lo, tun ṭumah erawh a hmaa ding apiang a vaw chhuak hmiah hmiah. Thahrui a ngah bakah skills a nei ṭha a, a rualpui dangte aiin a rilru a puitling hma bawk a ni.

Hmabak a tam
Infiammite hmelma lian tak chu 'Hliam' a ni. Alcaraz pawh hian harsatna hrang hrang a la hmachhawn thei, theihna nei sang tak ni mah se eng ang takin nge hringnun a hman chhoh dawn hriat a la ni lo.

Coach Ferrero chuan, "Tunah hian a nih tur ang 60% vel chauh a la niah ka ngai. Hmasawn a ngaihna lai tam tak ka la hria, ani pawhin inzir belh zel a la tum," tiin a player chungchang a sawi a, an thlen chin aṭanga hmalam pan zel an tum.

Kum 2020 khan Ferrero hian Alcaraz hi Novak Djokovic leh Federer te nen a lo khaikhin tawh. Coach Ferrero chuan, "Anni pahnih hi chu baseline aṭang pawhin an hlauhawm, chumi hnuah net bula point hmuh dan an thiam bawk, anni ang hian Alcaraz pawhin a ti thei," a ti.

A lo thleng thut
US Open nomawi a chawi hnuah Carlos Alcaraz chuan, "Hetiang teh thut hi chu ka beisei lo, kum 19 chauha Grand Slam nomawi chawi hi chu ka rin aiin a rawn thleng hma, ka lawmna hi thua sawifiah dan mai pawh ka thiam lo," a ti.

Amah ang bawka Spanish player Rafael Nadal chuan Alcaraz hi a lawmpui thu a sawi nghal, "Nomawi tam tak awm tur zinga pakhat," tiin Grand Slam title dang tam tak a lak ngei a rin thu a sawi a, a hnampui hi lawmpuina a hlan bawk.

Alcaraz chuan, "Nomawi pakhat ka nei ve chauh a, Rafa chuan 22 a nei tawh! A hnungah ka kal ve chauh," tiin mipa player zinga Grand Slam chawi hnem ber Nadal chu a dahsang hle a, ani nena khaikhin nih a duh rih lo.

Ruud vanduaina
Casper Ruud tan vanduaina a la kaltluang - Grand Slam final vawi hnih a khel tawh a, a chak lo zawkah a ṭang ve ve. US Open hma hian French Open final-ah Nadal a ngam lo, major title hmasa ber tur chu a nghah rih a la ngai.

Kum 23 mi Ruud chuan, "Inkhel a zo a, a chak lo zawka ṭan chu a hrehawm thei hle. Mahse, kar hnih chhung ṭha takin tennis ka khel a, player ropui tak takte ka hneh bakah nasa takin hma ka sawn, lungngaihna karah pawh lawmna tur chu ka hmu," a ti.

Norway tlangval hi a kum a la tam bik lo, theihna sang tak a nei ve bawk. Nomawi leh number 1 nih theihna hloh mah se, tun dinhmunah world number 2 a ni tho a, season thar atan hmabak êng tak a la nei ve bawk.

Ngaihnawm
1. Alcaraz hian season kal laiah match 51 zet hnehna a chang tawh, chak hnem lama amah hnaih bertu Stefanos Tsitsipas (46 wins) aiin match ngain a chak tam zawk.
2. US Open final thleng tur khan match thum chu a zawnin set nga a khel, final hma khan court chhungah darkar 20 leh minute 19 zet hun a hmang hman.
3. Chanpion tura a hun hman zawng zawng khan darkar 23 leh minute 39 a ni. Grand Slam bikah, kum 1999 aṭanga record mumal awm chinah tournament pakhata hun hmang rei ber a ni.
4. Spanish mipa player zingah Alcaraz hi world number 1 ni thei palina a ni. Tun hmain Nadal, Juan Carlos Ferrero leh Carlos Moya te chu number 1 an lo ni tawh.
5. Season kal laiah nomawi panga a chawina chiah a ni, US Open hma hian Miami leh Madrid Open a la bawk, heng inelna pahnih hi ATP Masters 1000 niin Grand Slam dawta ngaihhlut a ni.