A tawpa buai Spurs chak lo

Tottenham Hotspur chu Sporting Lisbon lakah 2-0 in an chak lo, hun tawp dawnah Spurs hian goal hnih an chhuah. Portuguese club tan hian Paulinho leh Arthur Gomes ten goal pawimawh an khung.

Antonio Conte naute hian tun season inelna hrang hrangah chak loh an la nei ngai lo, mahse an record kaltluang duhawm tak hi Sporting Lisbon lakah a thamral. Team pahnih hi Champions League group D hmahruaitu nih inchuh tur an ni dawn.

Group D inkhel dangah Eintracht Frankfurt chuan Marseille 1-0 in an hneh, goal awmchhun hi Jesper Lindstrom khung a ni. Sporting hnuaiah Spurs leh Frankfurt te an awm, group pakhat aṭangin team pahnih chauhin last 16 an lut ang.

Spurs an bil
Thawhlehni zan inkhelh hmain Sporting coach Ruben Amorim chuan, "Tottenham hian khawvela hmatawng hlauhawm berte zinga mi an nei," a ti a, mahse, tun season match riat an khelh tawha a vawi khat nan North London club hian goal an khung lo.

Marseille laka goal hnih khungtu Richarlison chuan bul ṭanin goal khung theihna remchang pawh a hmu nual. A shot chu Liverpool defender hlui Sebastian Coates-a'n a dan bakah a ball tauh pawh goalkeeper Antonio Adan chuan a lo dansak.

Second half-ah pawh Richarlison bawk a hlauhawm, striker Harry Kane ball pek a dawn hmasak chu a lo offside hlauh a, a hnuah remchang vawi hnih hmu leh mah se a khung thei lo - Ligue 1 club laka a vanneihna ang kha a nei nawn thei bik lo a ni.

Tottenham manager Antonio Conte chuan, "Goal khung kan tum nasa hle, inkhel harsa tak ni mah se goal khung theihna remchang kha kan insiam hnem thawkhat. A bik takin hun tawp dawn minute 10 chhung kha khel ṭha zual tur kan ni," tiin a sawi.

Spurs hian Inrinni zanah Leicester City an mikhual zui dawn. Premier League table-a pathumna hian league lamah tlawm an la nei lo a, manager Conte chuan kar tawpa Foxes nen an inkhelh tur atan rilru an pek chhunzawm nghal tur thu a sawi bawk.

A tawpah goal
Sporting Lisbon lamin an goal venhim chu hnapuiah an nei hmasa, an tum an tihlawhtling. Anmahni an inven karlakah Tottenham an nawr let thut ṭhin a, hlauhawm taka chet an ngah - Spurs player hlui Marcus Edwards chu a hnawk hle.

Goal a lut har, minute 90 thleng pawhin a lut lo. Hun pek belh an khel ṭan tihin corner aṭanga ball kal Paulinho-a'n a tauh lut zawt a, keeper Hugo Lloris tan dan hman a ni lo - France international hian an lama lut tur chu hnai takah a en liam.

Sporting phur chhunzawmin an nawr leh thut a, Brazilian forward Arthur-a'n a hnampui Emerson Royal leh Argentine defender Cristian Romero paltlangin an goal hnihna a khung zui, goal khungtuin a tih ṭhat rualin Spurs tlarhnung an nem deuh hlek.

Sporting coach Ruben Amorim chuan, "Ka naute khan an theihna zawng zawng an hlan, khatiang baka sang leh ṭha ka chu ka beisei thei tawh lo ang. League bakah Champions League kan khel kawp a, hun chep tak karah pawh kan puitling tih a lang," a ti.

Goal a khung bakah assist neitu Paulinho pawh a lawm. Brazilian forward chuan, "Hnehna chang mah ila hmasawnna tur lai kan la nei. Inkhel hi chu a thawnthu hi a danglam zel. Marseille lakah si phur hmasa chungin kan tho chhuak, tunah erawh kan tum ang takin kan khel," tiin a sawi ve bawk.