Leverkusen hmaah Atletico an tlawm
Atletico Madrid season a fuh hleithei lo - league lama Celta Vigo (4-1) an sawp hnu lawkah Champions League group stage match khel turin, boruak ṭha tak nen Germany an pan a, khualmualah Bayer Leverkusen chu 2-0 in an ngam lo.
Leverkusen-in season an hmang ṭha lo hle - league match ruk an khelh tawhah vawi khat chiah an la chak a, vawi li tlawmin, vawi khat draw an nei. Team 18 inelna Bundesliga-ah 17-na an ni mek!
German club hian Champions League-a an match hmasa berah, team nem zawka ngaih Club Brugge chu 1-0 in an ngam lo bawk a, team ṭha Atletico Madrid laka hnehna chang turin beisei an ni lo.
Mahse, ban theih dinhmuna ding reng coach Gerardo Seoane-a'n tlawm a duh lo a, rin loh takin Leverkusen an ṭha zawk - second half-ah German club tan striker Patrik Schick chuan Atletico goalkeeper Ivo Grbic chauh a hmachhawn chungin bar a pet per a, Adam Hlozek chuan post a tauh per bawk. Atletico tan hian first choice keeper Jan Oblak chu hliam vangin a inlan thei lo.
Hun tawp a hnai a, Leverkusen an vannei ta nge nge - bench aṭanga luhitr Jeremie Frimpong a tal na a, minute 84-naah Robert Andrich goal khung tur siamsakin, Moussa Diaby khung tur a siamsak leh bawk - rin loh zawk German club-in 2-0 in hnehna an chang.
Atletico vanneih zan a ni lo ve bawk - Edmond Tapsoba handball vangin Spanish club hian penalty an beisei a, video assistant referee-a rawn chungin English official Michael Oliver chuan penalty a pe lo.
Mahse, replay en chuan ball hian Tapsoba kut a per ngei tih a lang a, goal luh hmaa handball hi ham ni ngat ta se, inkhel result a danglam mai thei.
Atletico captain Koke chuan, "Referee khan a thutlukna engmah min hrilh lo a, inkhel chhunzawm zel turin min tiringawt mai a ni," a ti a, referee thutluknaa an lungawi loh thu a sawi.
Group B inkhel dangah Club Brugge chuan rin loh takin FC Porto chu 4-0 ngawtin khualmualah an sawp a, Belgian club tan last 16 lut turin dinhmun a ṭha ta hle - Ferran Jutglà (penalty), Kamal Sowah, Skov Olsen leh Antonio Nusa ten goal khat ṭheuh an khung.