Sheriff mualah Manchester United Nikumah Real Madrid kan hneh - Sheriff Coach
Zanin dar 10:15 hian Manchester United chuan Europa League khel turin Sheriff Tiraspol an tlawh dawn. Moldovan club hian an khelmual pangngai Sheriff Stadium-ah mikhual an thleng dawn lo.
Russia leh Ukraine indonain a nghawng phak avangin Sheriff hian hmun him china ngaih Zimbru Stadium-ah mikhual an thleng dawn. UEFA chuan tun dinhmunah Sheriff khelmual pangngai awmna hi inkhelh nan a la him tawk loah an ngai a ni.
Real hnehtu
Mi tam tak chuan Sheriff Tiraspol hi kan la hre kher lo mai thei, European football ngainatute erawh chuan season hmasa lama Real Madrid barakhaihtu an nihna avangin an hre thung ang. Santiago Bernabeu-ah 2-1 in an chak tawh tlat.
Man United lakah pawh rinkai an ni lo. Mahse, an coach erawh a zam bik lo. Stjepan Tomas chuan, "Manchester United hi khawvela club lar an ni a, kar hmasa khan match an nei lo, tun karah match an nei dawn lo bawk.
"A pawimawh lai chu kan tlarhnung ven dan a ni ang, ka ngaihdan chuan chak turin theihna kan nei ve tho. Kan tan chuan anni ang team lian tum hi chona a ni, Ronaldo a khel emaw khel lo emaw pawh ni se a danglam lo turah kan ngai.
"Season hmasa khan Real Madrid kan lo hneh tawh a, Champions League leh Europa League match dang pawh kan khel nual tawh a, tawnhriat kan nei ṭha ve tawh hle," tiin a sawi a, team lian lakah chak lo turah a inngai bik lo.
United tan hun ṭha
Premier League khelh tur an neih loh avangin Erik ten Hag-a'n a duh ang player a chhawr thei ang. Real Sociedad lakah Raphael Varane, Scott McTominay leh Marcus Rashford te a chhawr lo a, Lisandro Martinez, Bruno Fernandes leh Jadon Sancho te bench-ah an ṭhu bawk.
Tun kartir khan Luke Shaw chu Carrington-ah a training leh tawh a, English defender hi manager-in a duh a nih chuan chhawr theihin a awm. Pre season hmang ṭha Anthony Martial leh Donny van de Beek te erawh hliam vangin an la khel thei dawn lo.
Man United hian Queen Elizabeth II an vui dawn avangin kar tawpah an inkhel dawn lo a, Dutch manager Ten Hag tan player hahchawlhtir kher ṭulna a awm dawn lo. English club hian Sociedad an hneh tawh lo a, Ten Hag-a hoten chak ngei an mamawh avangin player ṭha a luhtir thei a, chutihrualin Europa League a nih miau avangin 'risk' lain chhawr ngun loh zawk a hmang thei bawk.
Cristiano Ronaldo chu bul ṭan tura ngaih a ni. Portuguese forward hian pre season a hmang lo a, a kum a tam deuh tawh bawk. Ten Hag-a'n league lamah a chhawr rim lo, hei vang hian Ronaldo tan Dutch manager tih lungawi theihna remchang a ni thei bawk ang.
Zanin Inkhel Tur
Real Sociedad 10:15 PM Omonia Nicosia
Sheriff 10:15 PM Manchester United
Midtjylland 10:15 PM Lazio
Feyenoord 10:15 PM Sturm Graz
Olympiakos 10:15 PM Freiburg
Qarabag 10:15 PM Nantes
Trabzonspor 10:15 PM Red Star Belgrade
AS Monaco 10:15 PM Ferencvaros
Arsenal PSTP PSV
Bodo/Glimt 12:30 AM Zurich
Dinamo Kiev 12:30 AM AEK Larnaca
Rennes 12:30 AM Fenerbahce
Real Betis 12:30 AM Ludogorets
AS Roma 12:30 AM HJK
Union Saint-Gilloise 12:30 AM Malmö
Sporting Braga 12:30 AM Union Berlin