MPL9 Round 1&2 thlirletna ; Player thar, goal leh inpuahchahna ṭha

Zote Honda Mizoram Premier League Season 9 chu RG Stadium-ah September 8, Ningani aṭang khan khelh ṭan a ni a, Covid-19 vanga kum hnih chhung khelh a nih tawh loh avangin inelna pawh a danglam ta hle. Player thar chauh ni loin coach thar ṭhahnem tak hmuh tur an awm a, match riat khelh tawh aṭangin team tin an inpuahchah ṭha tih a lang bawk.

Coach thar
Aizawl FC-in coach atan Standly Rosario an lalut a, amaherawhchu East Bengal leh Mohun Bagan coach hlui Standly hi a rawn la thlen loh avangin Lalrozama Fanai-in a enkawl chhunzawm. I League club-in Rozama hnuaiah season bul ṭha takin an ṭan a, match hnihah an la chak ve ve.

Chanmari FC-in coach Rochhingpuia an hmang a, Chanmari fapa rangkachak tia sawi ṭhin Chhinga hian match hmasa berah Electric Veng hneh nghal mah se Chhinga Veng FC lakah an tlawm. Chhinga'n zinkawng thar a zawh a, MPL club lian zinga mi a enkawl avangin mawhphurhna pawh a sang dawn.

MPL club thar FC Bethlehem-in coach atan Victor Lalbiakmawia an lalut a, Mission Vengthlang tlangval hian Services lama a sulhnu neih ṭhat MPL-ah lantir a tum. FCB hi match hmasa berah FC Venghnuai nen an inhnehtawk a, match hnihnaah Aizawl FC an hneh lo. Victor leh a hote hi eng nge an an zel dawn, tih chu hunin a hril ang.

Electric Veng FC-in coach atan Shillong Lajong midfielder hlui Jacob Lalrawngbawla an lalut a, match hnih khelhah point an la hmu lo. Amaherawhchu midfielder talent nei ṭha tia sawi ṭhin Jacob-a hian a naute hi training a pe ṭha tih a lang a, Mizoram Police laka an goal khung chu MPL-a goal mawi zinga mi a ni - vawi 22 zet an inpass hnuah an pet goal.

Goal 22
MPL match riat khelh tawh aṭangin goal 22 a lut tawh a, match tina goal 2.75 lut ang a ni. Mak ang reng tak chu Bethlehem player Lalruatpuia chauhin goal hnih a khung a, player 21-in goal an khung tawh. MPL9-ah mahni lama ti lut an la awm lo a, penalty aṭangin goal thum khung a ni tawh a, penalty hlah a la awm lo.

Player ṭha ṭhinten an thiam an la theihnghilh lo. Ball pet thiam David Lalrinmuana leh Vanlalthanga ten freekick aṭangin an khung tawh a, Mizoram Police-in R. Malsawmtluanga freekick an hmang ṭangkai tawh. Aizawl FC wing back Lalbiakzuala'n a ke vei lam hmangin ball a vawrh lut ṭha ṭhin a, goal khat a khung tawh bakah assist vawi hnih a nei tawh.

Goal venhim kawngah Chhinga Veng an la che ṭha ber a, goal an la chhuah lo. Goalkeeper RS Lallawmzuala'n clean sheet vawi hnih a nei tawh. Police goalkeeper F. Lalmuanawma pawh a che ṭha a, match hmasa ber a clean sheet bakah Electric Veng an hmachhawn ṭumin goal thei tura ngaih vawi nga vel zet dangin man of the match-a thlan a ni.

Inpuahchahna ṭha
MPL9 khelh ṭan hmain I Day Football khelh a ni a, team tin an inpuahchah ṭha tih chu khelmualah a lang. Match riat khelh tawhah team nem bik tia sawi theih an awm lo a, team pariatte an la inhnehtawk hle. Electric Vengin point la hmu lo mah se Chanmari leh Police an hneh loh ṭuma an khelh dan thlirtute chuan an vanduai tih an hre thei ang.

MPL club thar FC Bethlehem pawhin champion lai Aizawl FC an khingpui tawk a, I League club-in hnehna chang turin vanneihna an mamawh. FC Venghnuaiin match hnihah point khat chiah an la hlawh chhuak a, chutihrualin Chawnpui FC an hneh loh ṭumin player pawimawh pali an chhawr thei lo - I Day Football 2022 semifinalist an nih miau avangin dah hniam theih an ni lo.

Chanmari FC leh Chawnpui FC ten point thum ve ve an hmu tawh. Chhinga leh a hote hi an insiamrem hunah chuan game mawi khel thei tur an ni a, Chanmarians-in an insiamrem hun an nghakhlel. Chawnpui erawh MPL hrechiangtu coach Lalsangzuala Hmar enkawl a ni a, squad nei ṭha tawk lo mah se an tawh a khirh zel ang.

Aizawl FC-in an squad chhah rah an seng a, Chhinga Vengin coach Anand Gurung leh Lalremruata te an kawl avangin I League club hi an el phaah a ngaih theih. Mizoram Police-in a vawi khat nan MPL nomawi chawi an tum a, an player neih dan thlirin thil theih ni mah se an khelh dan thlir chuan a awlsam dawn lo.