Pioli tan contract thar

AC Milan chuan manager thar neih tuma an hmalakna an tawp san thut a, an coach rawih lai Stefano Pioli chu kum 2022 thleng daih contract an ziahpui ta zawk, thutlukna an siam fel tih an puang.

Milan hian RB Leipzig leh Schalke 04 enkawl tawhtu Ralf Rangnick an rim ngawrh hle, khawthlang media-te chuan inremna an nei fel vek tawh angin an ziak hman hial. Mahse, tun hnaia match 10 chhung tlawm loa an kalna chuan nghawng a nei niin a lang.

Thuchhuah siamin Milan chuan, "Stefano Pioli hi kum 2022 thleng kan coach a ni chhunzawm zel ang, Pioli leh club chuan inremna an siam," an ti. Milan CEO Ivan Gazidis pawhin an inrem thei chu a lawm thu a sawi ve bawk.

Pioli chuan, "Ka chunga rinna nghattu AC Milan chungah ka lawm. Kan hma hun chu vawiin a innghat hi a ni a, min thlawptu zawng zawngte thawhpuiah ka sawm. Inpumkhat takin khel ila, hlawm khata kan awm chuan kan ṭha leh zual dawn a ni," a ti.

Milan hian Zirtawpni zanah an chunga awm Atalanta an mikhual zui dawn a, chumi hnuah Sampdoria leh Cagliari te an la hmachhawn leh ang. European football an khelh leh khelh loh chu an kuta innghat a ni.