Marquez an zai hlawhtling

MotoGP world champion ni lai Marc Marquez ban ding lam tliak chu hlawhtling taka zai a ni a, a rawn kir hun tur sawi chian theih la ni lo mah se August thlaah chuan intlansiak leh theih a beisei.

Pathianni khan MotoGP season ṭan nan Spanish Grand Prix an tlan, hnehna chan tuma thapui a thawhna lamah Marquez-a'n a bike thunun zo loin a tlu a, kawng sirah a tleng chhuak hial. A ban ding lam a tliak a, a nerve erawh a khawih lo hlauh. Spanish rider hi Thawhlehni khan Barcelona-ah zai niin, a team Repsol Hondo chuan a dinhmun a ṭhat thu an sawi, "A rang thei ang berin inelna a hmachhawn leh ang," an ti.

Kum 27 mi Marquez hian MotoGP title vawi ruk a la tawh, tun hnaiah bik phei chuan bike intlansiakna sang ber hi a thunun hneh hle. Kuminah pawh champion leh tura rinkai ber a ni, hliam a tawh avang erawh chuan a kawng a harsat phah dawn. Marquez-a zaitu doctor Xavier Mir chuan, "Kan thil tum leh beisei chu August 9-a tlan tur Czech Republic Grand Prix-a inlan a ni," a ti. An beisei ang a nih chuan intlansiak pakhat bak a hmaih dawn lo tihna a ni.

Tun kar tawp hian Jerez tlan kawngah bawk Andalusia Grand Prix tlan a ni dawn. Honda chuan Marquez hmunruak luahtu tur hi lak lailawk an tum lem lo, an rider pakhat zawk Alex Marquez chungah rinna an nghat ang. Repsol Hondo boss Alberto Puig chuan, "Marc hian ngaiawh leh turin hun a mamawh tih chu a chiang, chutihrualin an zai leh enkawl danah kan lawm, a lo kir hun chu nghakhlel takin kan nghak," a ti.