Potter-a Chelsea an chak zo lo

Chelsea-in an coach Thomas Tuchel banin Graham Potter an lalut a, mahse, Brighton & Hove Albion coach hlui kaihhruaina hnuaia an match hmasa berah hnehna an chang zo lo!

London club hian an lakah chuan team tenau tia chhal theih Red Bull Salzburg chu Stamford Bridge-ah an mikhual a, Champions League group stage match-ah 1-1 in an inhnehtawkpui.

Chelsea tan Raheem Sterling chuan goal hmahruai a khung a, mahse, Austrian club tan Noah Okafor chuan si phurh rawn sutin, point khatah Blues-in lungawi an zir.

Group E inkhel dangah AC Milan chuan 3-1 in Dinamo Zagreb an hneh a, point li hmuin hma an hruai mek - Chelsea erawh match hnih aṭangin point khat chiah an nei a, Potter tan hna hautak a inṭan e!

Potter a huaisen

Kum 47 mi Potter hian Premier League-ah season thum chiah tawnhriat a la nei a, Champions League-a Chelsea meuh kaihruai tur chuan a tawnhriat a beitham hle - mahse, London club-in a chungah rinna an nghat miau a, Chelsea a kaihhruai hmasak berah CL a hmachhawn nghal.

Hetiang boruak karah hian Potter-a'n thutlukna huaisen thlak a siam a, Wesley Fofana, Kalidou Koulibaly leh Ben Chilwell te chu bench-ah a dah vek a, lehkhaah 4-2-3-1 tiin a formation chu tarlan ni mah se 3-4-3 zawk a rawn hmang niin a lang.

Potter-a'n huaisen taka defender man to rual bench-a a dah aimaha mak zawk erawh left wing-back anga Sterling a chhawr chu a ni a, Mason Mount leh Kai Havertz ten tlarhmaah Pierre-Emerick Aubameyang chu an thlawp.

First half-ah chance sawi tur a tam lo a, Mason Mount chuan uiawm taka a hlah bakah Salzburg tana Benjamin Sesko-a chance duhawm chu Kepa Arrizabalaga chuan post-ah a dan persak bawk.

A goal ta

Chelsea-in first half-ah goal an khung lo a, second half-ah erawh goal khung turin hun an mamawh rei lo - Sterling chuan minute 48-naah a rawn khung a, Stamford Bridge thawm chu ring tak a ni.

English right back Reece James chuan mual ding lam sir aṭanga ball lalutin, Mount tan a siamsak a, kum 23 mi attacking midfielder hian Auba tan a siamsak - mahse, Arsenal striker hlui hian a a control fuh tawk lo a, Sterling ke bulah a tla.

Manchester City forward hlui hian harsatna nei loin goal-ah a chantir a, player thiam bik ke aṭanga chhuak awm renga mawi a ni. Mahse, Chelsea hlim chhung a rei lo - minute 75-naah Salzburg player-te ball inpe mawi tak chu Sterling leh Cucurella ten an dang thei lo a, Chelsea goal lamah an tlan luhpui.

Junior Adamu ball tlan luhpui chu Silva chuan lo tackle mah se, Brazilian defender hian a tifuh tawk lo - Adamu a tlang a, Noah Okafor chuan ṭha zeta a hmawr lo bawkin goal-ah a chantir a, team goal a ni.

100%

Chelsea hi an vanneih zan ni se chak thei an ni - mahse, Reece James chuan uiawm takin freekick a hlah a, Hakim Ziyech chuan a chance duhawm neih chu a chhawr thei lo bawk.

Blues coach thar Potter chuan, "Point khat chauh kan hmuh avangin hrehawm kan ti a, mahse, ka player-te inpekna erawh fak phu a ni. An theihna zawng zawng an hlan a, an chungah ka lawm hle.

"Coach thlak leh chumiin a ken tel thil avangin ka player-te tan a awlsam lo tih ka hria a, mahse, an khelh danah ka lawm hle. An professional a, an rinawm a, mawhphurhna an la ngam bawk. An theihna 100% an hlan," a ti.

Hetihlai hian Milan an chak a, Olivier Giroud (penalty), Alexis Saelemaekers leh Tommaso Pobega goal hmangin Dinamo an hneh - Croatian club tan Orsic chuan goal khat a khung a, a team a chhan thei lo.