Tlai dar 3-ah MPL8 final rematch

Zote Honda MPL9-ah vawiin tlai dar 3:00 hian match hnih khelha chak ve ve Aizawl FC leh chak lo ve ve Electric Veng FC te an inkhel dawn. Team pahnih hi MPL hnuhnung ber final-a inhmachhawn te kha an ni.

Aizawl FC hi coach Lalrozama Fanai hnuaiah an la chak ve ve a, head coach Standly Rosario-a'n round 4-ah I League team hi a ho theih tawh hmel avangin Bawngkawn tlangvalin vawiin hi mawhphurhna a lak hnuhnun ber a ni thei ang.

I League club squad a chhah ṭha a, coach Rozama pawhin duh tawka player thlak kual tur a nei. Chutihrualin Aizawl FC hian nuamsa takin match hmasa pahnihah hnehna an chang bik lo a, Electric Veng lakah team ṭha zawk ni mah se chak chiang tura dah a rem lo.

Electric Veng hian point la hmu lo mah se Mizoram Police nena second half an khelh dan thlir chuan team ṭha tak an ni. Captain David Lalchhuanawma'n inrintawkna nei turin goal a khung a, Aizawl FC tlarhnung tan pawh a hnawksak thei ang.

Team chhia an ni lo a, an khelh tawh dan enin vawi khat chaka insiam ṭha thei tur team an ni.

EFC hi midfielder ṭha tiha sawi ṭhin Jacob Lalrawngbawla'n a enkawl a, ani hi player angin a inziaklut tel bawk.