Mizo rawltharin India a champion pui
South Asian Football Federation Under-17 Championship-ah India an champion a, Mizo rawlthar Vanlalpeka Guite (Sentea) captain-na hnuaia khel India hian nomawi chawi turin Nepal chu 4-0 in an sawp.
Group stage lamah team pahnih hi an lo intawng tawh a, 3-1 in Nepal an chak. Mahse, final-ah India-in phuba an la ta a, Khawzawl rawlthar Vanlalpeka a langsar a - tournament-a player ṭha bera thlan a ni zui.
India hian minute 30 chhungin Boby Singh leh Korou Singh hmangin goal hnih an khung hman der a, Sentea siamsak ve ve an ni - Nepal an talbuai zui a, captain Prashant Laksam chuan a kiua Danny Laishram a nghawk luih avangin minute 39-naah hnawhchhuah a ni.
Colombo, Sri Lanka-a inkhelah India-in inkhel an thunun zui a, minute 63-naah Sentea bawk inlar lehin, India goal thumna a khung.
Aman chuan hun pek belhah champion nemnghehna goal a khung bawk. Aman-a goal khung hi Mizo rawlthar Lalpekhlua siamsak a ni a, Bawngkawn winger hi bench aṭanga luhtir niin, a vanneih ṭum ni se goal khung thei dinhmunah a ding - India an chak a, final-a goal li an khungah Mizo an inrawlh vek!
India captain Vanlalpeka Guite hi Most Valuable Player of the Tournament-ah thlan a ni a, India goalkeeper Sahil chu Best Goalkeeper atan thlan a ni bawk.
SAFF U17 champion team squad-ah hian Sentea leh Lalpekhlua bakah Champhai attacking midfielder Lalhmingchhuanga Fanai a awm bawk a, Indian football-ah Mizo hming a mawi leh ta.
Sentea chuan, "Hmun hrang hrangah trial ka nei ngun a, ka tlin theih loh avangin ka nu hian a rem ti chiah tawh lo. Mahse, MFA lamin tuna India U17 tura trial an rawn tih hian a tawp nan tak tak tiin ka trial a, ka tling ve ta hram a ni," tiin Vanglaini a hrilh.
India U17 captain hian Khawzawl DFA aiawh turin an khuaah trial a nei phawt a, a hnuah MFA leh AIFF hnuaiah Aizawl leh Goa-ah trial nei lehin a paltlang vek a, captain armband meuh hrengin a champion pui - hmanni lawka beidawng hman tawh rawlthar kha tunah chuan India club lianten an rim rawn mek a, "Thutlukna ka la siam lo," a ti.
Sentea chuan, "Eng level-ah mah hian best player ka la ni ngai lo a, MVP ka ni thei hi ka lawm hle. Tun inelna kan hmachhawn hma hian friendly match-ah vawi thum captain ka ni a, a tak ram em chu ka beisei ngam lutuk lo," tiin a sawi.
Khawzawl rawlthar hian SAFF U17-ah hian goal hnih a khung a, assist vawi li a nei bawk. Aizawl FC U15 tana lo khel tawh chuan, "Group stage-a Nepal kan hneh loh kha chuan ka hnual ve hman. Mahse, kan insiam ṭha a, kan champion thei ta a ni," tiin Vanglaini a hrilh.