Kan chak ve a hun tawh - Venghnuai coach

Zote Honda MPL9-ah FC Venghnuaiin chak an la nei lo a, vawiin chhun dar 12:00 hian RG Stadium-ah Chhinga Veng an hmachhawn dawn.

Venghnuai coach Lalrindika Hmar chuan, "Point khat chiah kan la hmu a, kan chak a hun tawh. Chhinga Veng hi team ṭha an ni a, mahse kan chak ve a ṭul tawh. Chumi tur chuan kan theihna zawng zawng nen kan khel ang," tiin Vanglaini a hrilh.

Venghnuai hian Chawnpui an hneh loh ṭuma khel thei lo midfielder Lalruatfela (RF-a) leh Eric Remruatpuia Chhangte bakah striker Lalrammuanpuia (Apuia) te la chhawr thei lo mah se defender Lalruatfela leh midfielder Peter Lalrinhlua te an

dam tawh.

Coach Rindika Hmar-in a club hlui Chhinga Veng lakah chak tum viau mah se a awlsam dawn lo. Chhingcows hi MPL9-a la khel ṭha ber zinga mi an ni a, an game a nghet ṭha hle.

Chhinga Veng coach Anand Gurung chuan, "Eng team mah hi dah hniam theih an ni lo. Kum dangah khan kan lo tisual tawh a, kan ṭhat dan berin kan khel ang," tiin a sawi a, team ṭha zawkah a indah tih a hriat theih.

Chhingcows hian goal an la chhuah lo a, Venghnuai lakah pawh an record ṭha hi chhunzawm an tum ang. Tlarhmaah Lalrinzuala an nei a, Serchhip striker ṭha hian inelna ṭha tak hmang mah se goal a la khung lo.