Federer a chawl dawn

Tennis player ropui, Grand Slam title ringawt pawh 20 teh meuh latu Roger Federer chuan tennis a chawlhsan dawn. Swiss star hian tun thla tawpa khelh tur Laver Cup zawh hunah a infiamna ngainat leh hmangaih ber hi a mangṭha dawn a ni.

Kum 41 mi Federer hi a vanglai a pel tawh, a hun hnuhnung lamah hliam vangin a buai hle. Wimbledon 2021 hnuah phei chuan a la inkhel leh lo, dam leh ṭha taka inkhelh leh theih beisei mah se a tlin dawn bik ta lo a ni.

Grand Slam vawi 20 champion tawh Federer chuan, "Ka taksa hriselna dinhmun ka ngaihtuah a, he thutlukna hi ka siam a ngai," tiin a sawi a, kum 24 chhungin tennis match 1500 chuang a khel a, khawvela player ropui berte zinga mi a ni kumkhua tawh ang.

Inelna lian Grand Slam title 20 a lak khan a chungnung ber ṭhin, a hnuah Rafael Nadal (22) leh Novak Djokovic (21) ten an rawn khûm a, nomawi lian tham ngah ber ni kher lo mah se, a tennis khelh dan leh thiam thilte chu midang chunga mi a ni.