Bethlehem aiin Chanmari an ṭha hret

Nimin tlai Zote Honda MPL9 inkhelah Chanmari FC-in FC Bethlehem lakah point thum hlu tak an hlawh chhuak a, 3-2 in an chak.

Coach Rochhingpuia hoten nung takin inkhel bul an ṭan a, minute 90 erawh an che ṭha tluan thei lo. Hun tawp lamah Bethlehemin na taka an nawr avangin Chanmari hi an vannei a tih theih a, MPL kaithar team erawh an vanduai tiin a sawi theih thung.

Goal thum phawt

Chanmari FC-in khelh dan phung thar an rawn nei a, defence laiah defender pathum awmin Lalramchhullova pawh a tel. Midfield-ah Malsawmzuala leh C. Lalhunmawia te kawppui turin tawnhriat nei ṭha Bawngkawn tlangval Lalnuntluanga dah luh niin tlarhmaah Lalhriatpuia'n bul a ṭan bawk.

FC Bethlehemin captain Sena Ralte leh defence laia a kawppui Hmangaihsanga te hliam vangin an chhawr thei lo a, coach Victor Lalbiakmawia'n loh theih loin squad a siksawi a ṭul phah - an vanduai hle.

Chanmariin bul an ṭan ṭha zawk a, chance pawh an nei ṭha hmasa. Goal erawh minute 17-naah a lut chauh a, Lalhriatpuia'n left back Lalremruata siamsak chu a ke vei lamin goal-ah a pet lut.

Khawruhlian tlangval Remruata a hmuhnawm zui a, minute 23-naah vei lam aṭangin cross ṭha bik neiin Lalhmunmawia'n (Amawia) a tauh goal. Chanmariin inkhel an thunun a, awlsam taka chak turin lang mah se an muthlu zeuh.

Minute 25-naah Chanmari midfielder Tluanga ball hloh aṭangin Bethlehemin an vaw let a, Lalnunzira chuan fing taka ball vawrh lutin Lalbiakdika'n goal-ah tauh mah se Chanmari keeper Lalrinzuala'n a dang. A per hi BD-a'n goal-ah pet mah se Rinzuala'n a dang nawn a, ball per chu chiang takin Isak Vanlalruatkima'n a pet goal.

Bethlehemin si phurh an sut ṭhen ran avangin inkhel a nun phah a, coach Victor-a'n substitution pahnih siamin an khel ṭha sawt bawk.

Vannei leh vanduai

Second half-ah Chanmari an vannei zui a, minute 53-naah Lalremruata corner pet chu goal-ah a kal a, keeper V Lalthlamuanpuia'n a tihtur titawk loin goal-ah a lut.

Chanmariin 3-1 a hma an hruai tak avangin an dinhmun a ṭha a, amaherawhchu Bethlehem goal nawr na tak an dawl zo lo.

Goal hmahruai khungtu Isaka'n fing takin Remruata lakah penalty a hlawh chhuak a, Zirtea rawn pen chhuakin minute 65-naah cool takin a khung.

Bethlehemin point khat hlawh chhuak turin a hma aia nain an nawr a, Chanmari tlarhnung a nghing nasa hle. Substitute Lawmsangzuala (Puipuia) goal khung chu offside vangin pawm a ni lo a, Lalruatpuia pawhin hnai tak aṭangin goal ruakah a khung lo. Puipuia hian Moses-a ball pek fing tak chu hnai set sawtah a hlah a, chance ṭha an hlah tam avangin Bethlehemin point an hlawh chhuak lo.

Coach thukhawchang

FC Bethlehem coach Victor Lalbiakmawia chuan, "Inhliam kan ngah a, Thawhlehniah kan khel chauh a, Ninganiah kan khelh leh a ṭul si a, a harsa a ni. Theihtawp kan chhuah a, result ṭha zawk kan neih thuai ka beisei," tiin Vanglaini a hrilh.

Chanmari FC coach Rochhingpuia chuan, "Khelh dan thar kan en chhin a, kan tiṭha viauin ka hria. Second half-ah erawh chak lo zawk Bethlehem lam nawr a na ve bawk a, kha chu football kalphung a ni," tiin an khelh dana a lungawi thu a sawi.