Chawnpuiin Police an chelh

Zote Honda MPL9-ah nimin tlai khan Mizoram Police leh Chawnpui FC-te an inkhel a, goal awm loin an inhnehtawk.

RG Stadium-a inkhelah hian chance ṭha hmuh tur a awm meuh lo a, team pahnih an intluk tawk hle. Hun tawp lamah erawh Police-in chance ṭha an nei a, Malsawmfela'n hnai tak aṭangin a pet over.

Chawnpui pawhin goal khung theihna tur an nei a; MC Malsawmzuala, Lalsawmzela leh Laltlanzova ten hnai tak aṭangin freekick an pet goal lo vek.

Police coach Lalbiaksanga Colney chuan, "Kan inhnehtawk a, chance pawh kan nei ve ve. Draw kha result awm tak a ni. Referee sawisel chi ka ni lo.

"Tun ṭumah erawh kan player warning pawh pe loa yellow card a hmuh laiin anni lamah jersey no. 9 (Zozoa) kha chu vawi nga a foul hnuah pawh card a pe lo," tiin a sawi.

Chawnpui coach Lalsang-zuala Hmar chuan, "I Day Football champion zo hlim kan khel a, an phur lai tak kan chelh thei kha ka naute ka chhuang. Kan team chu I Day Football-a Bethlehem ho kât hrep kha kan nia, hun rei lo tê chhungin hma kan sawn viau a sin," tiin an khelh dana a lawm thu a sawi ve bawk.