Danglam tura siam Messi

Lionel Messi, Neymar leh Kylian Mbappe ten goal an khung leh ta ṭhap mai. Paris St-Germain hmatawng pathumte hi dan theih loh ang maiin an kaltluang mek a, an hmaa ding chu an hneh deuh zel - Nilaini zan Champions League inkhelah pawh Maccabi Haifa 3-1 in an hneh.

Mak deuh mai chu, Israeli club Maccabi Haifa hian minute 24-naah Tjaronn Chery hmangin goal hmahruai an khung, chawlhlawk hmain PSG tan Messi chuan a sut. Mbappe-a cross chu yard riat chauh a hla aṭangin a khung.

French champion hian goal erawh an khung chhunzawm thei mai lo, second half minute 69-naah Mbappe a inlar. France international hian box sir aṭangin nidanga a goal khung ṭhin dan bawkin a khung, keeper tan ven hman a ni lo.

Mbappe goal a ṭha, chutihrualin a siamsaktu Messi khan player pahnih inkarah ball a lir lut, a dawngtu tan chuan duhthusam a ni ang. Hun tawp dawnah Neymar chuan an chak nemnghehna a khung bawk a, khualmualah point thum an hlawh chhuak.

PSG an chak a, an player pawimawh Messi tan zan chhinchhiah tlak a ni bawk. Argentina captain hian Champions League-ah club hrang hrang 39 lakah goal a khung ta, club hrang laka goal khung hnem lamah Cristiano Ronaldo (38 club) a khum.

Record pakhatah hian a tawp mai lo, a zawnin season 18 teh meuh chu Champions League-ah goal a khung ta a, hei pawh hi record thar a ni. A record nih rual emaw khum emaw tur chuan player dangin an nghah rei a ngai ve khawp ang.

PSG hian an match hmasa zawkah Juventus an hneh tawh a, match hnih aṭanga point ruk hmuin group H hmahruaitu an ni, an match lehpekah chuan Benfica nen an inkhel ang, team pahnih hian point ruk ve ve an nei.

Nilaini zan group H inkhel dangah Juventus chu an mikhual Benfica lakah 2-1 in an tlawm. Massimiliano Allegri naute hi a zawnin an chak lo, match hnih aṭanga point an hmuh miah loh avangin last 16 luh a harsa dawn.

Old Lady tan Arkadiusz Milik-a'n minute lina lekah tauh lut mah se, mikhual tan Joao Mario chuan chawlhlawk hmain penalty aṭangin si phurh a sut a, second half-ah David Neres hmangin chakna goal an khung bawk.

PSG an ngam loh hnuah Serie A an khel a, team nem Salernitana chu an inhneh-tawkpui hram, tunah Benfica lakah an tlawm zui leh nghal. Turin club ṭantute zingah Allegri thlak duhtu thawm a ring ṭan, season hmasa aṭanga team din thar an nih tawh avangin an dawhthei rei lo mai thei.

Juve manager Allegri chuan, "Thil sawifiah ngai tam tak a awm, a tawi zawnga sawi chuan 2-1 a nih hnu khan tho chhuak turin thahrui kan nei tawh lo. Hetiang thil hi chu football-ah chuan a thlen chang a awm ve ṭhin.

"Champions League-ah a zawnin match hnih kan chak lo, ka tan chuan hetiang thil hi kum 10 chhunga a thlen vawi khatna a ni. Hmasawn kan ngai, hmasawn tur chuan kan thawhrim a ngai bawk," tiin a sawi a, a player hliam ṭhenkhat chu an chhiatpui tih a sawi bawk.