Tunlai Mizoram Cricket Part 2

UAE lamah Asia Cup khelh zawh a lo ni ta a, tournament ṭan hma khan Sri Lanka an champion ring hi za zelah eng zah tak ni ang maw? Mahse infiamna khawvel ropuina a ni tlat lawi si.

Kan hma lawka Australia-a T20 World Cup khelh tur atan inpuahchahna ṭha tak a ni e, pitch leh boruak inang lo mah se, match fitness tluka pawimawh hi infiamnaah chuan a awm lo an tih kha maw!

Hmana Virat Kohli kan hmu leh a, tun Asia Cup Conference-a a lamtual boruak vela zuzi ve lo, a tak rama harhtharna chang langsar zingah a tel awm e.

Chutihrual chuan, India A leh Under 19 leh National Cricket Academy a enkawl dana fak hlawh em em Rahul Dravid a coaching leh captain Rohit Sharma kaihruaina hnuaiah hian India team hian lei rem a la rap meuh lo tih hi hai rual a ni lo a. Kan hma lawka T20 World Cup hi anni tan chuan fiahna pawimawh ber a ni dawn chiang!

Duleep Trophy

Inkhel an ṭan hma ngawt a, Ajinkya Rahane leh a hoten North East Zone an sawp dawn tih sawi lawk tur hian zawlnei nih a ngai kher lo a, amaherawhchu tui let hnua North East Zone aiawha Mizo tlangval pahnih he team-a an tel ve hi a ropui thlawt.

Chutihrual chuan an thiam vang leh ṭhat vang ni lo a, Sikkim lam unaute an huangtau lutuk leh a fawng an intichelh lutuk erawh, khua reiah anmahni a vaw let ang tih a hlauhawm.

North East lam unaute ho nena kan titi honaah pawh, lal ngai lo lal a na an tih ang deuhin, mi ngaihsan aiin, nuihzat leh en rawn an hlawh ta daih a, hetah tak hian Mizoram cricket lam hruaitute leh hotute ṭan lak ngaihna lai a ni awm e.

Local thu vakvel

Mizoram cricket-in hma a sawn zel a, he thu buatsaih lai hian Supreme Court in Saurav Ganguly leh Jay Shah te, state a an term leh BCCI a an term chu belh kawp a ngaihloh thu a lo pass chiah bawk nen.

Kan hma lawkah hian Cricket Association of Mizoram pawh, BCCI rualin kan inthlang ve dawn a ni a. Arkhawthimdai chunga term khatna chu kan lo hmang zo ta a. Honeymoon period a lo zo ta a, tunah chuan a tak leh a khal deuh hlek a, professional zawka an kaihhruai a ngai ngei tawh ang.

NGO nilovin Professional Organization

Mizoram pawl tamtak YMA, kohhran, tlawmngai pawl dang etc te hi chu thlan tlinten an kaihruai mai a, a pawl a len deuh leh sub committee hrang hranga chanvo ṭhen darh mai a ni.

Mahse Sports Organization hi chu professional industry pakhat a nih avang hian, organization a lungthu pathum, an hnathawh inang lo vek mah se pumkhat ni si, governance, administration leh management awmzia hi kan bel leh deuh a ngai ngei ang.

Ṭhahnem ngai taka theihtawp chhuah chunga rawngbawlnaa ke pen anga kan ngaih pawh hian, a kalphung a dik miau loh chuan, missionary thawhhlawk lo tak a nih theih ang bawk hian, pawl hi a hruaibo vek theih.

Hetah tak hian tun term thar aṭang chuan Mizoram Cricket hruaitu turte hi a tu te pawh lo ni se, microscopic enfiah a, chhui an ni reng tawh dawn tih a chiang.

Nimin lamah Indian Cricketers Association Conference hlimawm takah Mizoram aiawhin kan palai ve a. Chutah pawh chuan kan thutlukna chu, Supreme Court-in Lodha hmanga a thu ken hi a la ni reng.

Cricketer-ten nasa zawkin he pawl hi an kaihruai leh khalh ngil tur a ni. Sporting Organization a pawimawh ber, a focus chu a inkhel tute hi an ni a, anni vanga thil dang zawng zawng hi chu awm chauh a ni.

Infiammite chu khel ṭha (perform) tura beisei kan ni a, chutiang bawk chuan, a tehna ngai bawkin kan governance, administration leh management te hi teh an dawl ve em? tih hi he bung thar aṭang chuan kan inzawhna lian ber a ni fo tawh ang.