Marquez a intlansiak leh dawn ta

A ban ruh tliak an zai a, season thum deuh thaw chu mumal lo takin a awm ta, harsatna karah Marc Marquez chuan chanchin lawmawm a nei. Tun kar tawpa Aragon Grand Prix an tlan hunah Spanish rider hian inelna a hmachhawn dawn.

Kum 2020 khan intlansiak hmasa berah Marquez hi a chesual, a tirah chuan hliam na vak loah an ngai a, chawlh pawh ngai rei lo tur angin a sawi. Mahse, a hnuah a ban hi vawi khat zai mai pawh a tawk lo, zai nawn a ngai hial.

A kar lakah inelna hmachhawn ṭhin mah se, a na a reh fel theih loh avangin zai nawn a ngai leh ṭhin. Tun season pawh a tir lamah chuan intlansiak a hmachhawn thei a, amaherawhchu United States-ah an zai nawn.

Honda rider Marquez chuan, "Ka hmel hi en ula, ka hlim tih in hmu ang. A awmzia chu kar tawpa Aragon GP kan neih hunah ka intlansiak dawn, he thu hi team leh doctor te nen kan sawiho hnua thutlukna siam a ni.

"A harsa dawn tih chu ka hria, ka hliam hian eng ang takin nge ka rilru a nghawng pawh kan la hre thuai ang. A ṭha ber nih leh ka tum dawn a, tun season tawp lama inelna ka hmachhawn leh thei a nih chuan nakkum atan ka tan a ṭha ang," tiin a sawi.

Bike intlansiakna sang ber MotoGP hi September 18, Pathianni tlai dar 5:30-ah an tlan ang.