Alcaraz tel loin Spain an chak

US Open champion hlim Carlos Alcaraz chu an ram Spain tan a inlan rih lo a, entu mipui zingah a ṭhu. World number 1 tel lo pawhin Spain hian harsatna an tawk lo - Nilaini zan Davis Cup inkhelah Serbia chu 3-0 in an hneh.

Match hmasa berah Albert Ramos Vinolas chuan Laslo Dere chu 2-6, 7-6 (5), 7-5 a hnehin Spain tan bul a ṭan fuh a, inkhel pahnihnaah Roberto Bautista Agut chuan Miomir Kecmanovic chu 7-6 (5), 7-6 (5) in a hneh bawk.

Chak zawk ni turin match thuma hnehna chan a ngai, match thumnaah pawh Spain bawk an chungnung. Marcel Granollers leh Pedro Martínez te ṭangdun chuan Nikola Cacic leh Dusan Lajovic te chu 6-7 (5), 6-2, 6-2 a hnehin an ram an chakpui.

Ram leh ram mipa team hmanga inelna hi Italy, Germany leh Scotland-ah te pawh group match khelh a ni bawk. World number 1 hlui Andy Murray pawh Great Britain tan a inlan a, doubles-ah Joe Salisbury nen ṭang dunin an chak lo.

Britain hian United States chu 2-1 in an hneh lo a ni.