Tennis chhungkua leh lainate,
Tennis hmanga ka ṭhian leh hmelhriat neih, chhungkua leh ka elpuite, chung bakah tawp chin nei loa min thlawp tlat ṭhintu fan-te, tunah hian thu thar pakhat hrilh tur che u ka nei asin.
In mi hriat pui angin, tun hnai kum thum chhung chu hliam leh inzai vangin ka buai hle. Ṭha taka inkhel leh thei turin theihtawp ka chhuah a, mahse ka taksa chuan a theih chin tawk a thleng tih ka hria. 
Kum 41 mi ka ni tawh a, season 24 chhungin match 1500 chuang ka khel. Tennis hian ka duhthusam leh suangtuah phak bakah min hruai, tunah chuan ka tennis zinkawng chu a tawp a lo hun ta.
Kar leh hian London khawpuiah Laver Cup kan khel dawn, ka tan chuan ATP Tour hnuhnung ber a ni ang, nakin zelah tennis chu ka la khel dawn. Mahse, chungte chu Grand Slam emaw, ATP Tour emaw a ni tawh lo ang.
Thutlukna harsa leh khirhkhan a ni a, a chhan chu tennis-in zinkawng ngaihnawm min pek zawng zawng hi ka ngai dawn hle. Mahse, kawng lehlamah chuan lawmna tur tam tak a awm, tennis khel tura talent pek bik ka ni a, ka talent dawn chu ka beisei aia ṭhain ka hmang chhuak a, ka rin aiin a rei bawk.
Ka nupui duhtak Mirka chungah ka lawm, ani hi ka tan engtik lai pawhin a awm reng. Thla riat mi fa a pai chung pawhin ka inkhel min en a, tun hnai kum 20 chhung chu ka team zingah a tel, ani bakah hian ka fate pali pawhin min thlawp reng ṭhin. Khelmual sira annin min thlawp ka hmuh hi ka tan chuan a hlu a, kumkhuaa ka hriatreng tawh tur a ni.
Ka nu leh pa bakah ka unaunu chungah pawh ka lawm, anni tel lo chuan engmah lo mai ka ni ang. Kawng dik ka zawh theih nana kawng hrang hranga min kaihruaitute chungah lawmthu ka sawi. Kum naupang tak ka nih lai pawha min ring ngamtu Swiss Tennis chungah ka lawm, anni hian bul ṭan min phalsak.
Sawi hmaih theih loh chu ka team - Ivan, Dani, Roland te bakah Seve leh Pierre te a ni, anni hian tun hun ka thlen theih nan thurawn ṭha tak tak min pe. Tony pawh, ani hian kum 17 chhung ka zinkawngah hmun pawimawh a chang, ka tan in ṭangkai em em vek a ni.
Tennis court chhunga ka elpui zawng zawngte, nangni nena inelna kan chhawp chhuak thei hi ka lawm. Hriatreng tur match kan khel a, theihna leh tumruhna nen kan bei, sulhnu ropui hnutchhiah turin theihtawp ka chhuah theih chhan in ni, kan in ti chak tawn - nangni ho nen hian tennis bung thar kan kai.
A chunga ka sawite bakah hian, ka fans duhtakte sawi hmaih an thiang lo. Nangni hian eng ang takin nge chakna min pek in hrethiam lo zawk hial ang, stadium khat tlata min thlawptu an awm ṭhin kha chu ka nuna thil nuam a ni. Nangni tel lo chuan, heng hlawhtlinna te hi a awm thei tak tak lo, hlimna leh thahrui min pe.
Tun hnai season 24 chhung khan zinkawng ngaihnawm tak ka zawh a, a chang chuan khang hunte kha ni khat chhung leka thleng ni ang maite hian ka ngai ṭhin. Ram hrang hrang 40 zetah ka inkhel kual a, khang hmunah khan hlimna, lungngaihna leh hliam te ka tuar, khang zawng zawng kha nuam ka ti vek.
Ka inkhelh kualnaah ṭhian ṭha ka chhar a, ṭhenkhat chu dam chhunga ka ṭhian ni hlen turte an ni. Hun chep leh harsa tak karah pawh ka tan an awm reng a, ka tan chuan anni kha an hlu. Ka lawm e.
Tennis zinkawng ka zawh ṭan dawn khan, kan khua Basel-ah ballboy mai ka ni. Player ropui leh lian tak takte inkhel ka en a, khang thilte khan duhthusam min siamsak, ka duhthusam a thlen dik theih nan ka thawhrim phah bawk.
Chuan, Swiss rama naupang pakhat, ballboy ve mai duhthusam a thlen dik theih nana min thlawptu zawng zawng tute chungah ka thinlung takin lawmthu ka sawi takzet a ni.
A tawp berah chuan, tennis hi ka hmangaih, ka phatsan ngai lo ang. - Roger Federer
Federer Chanchin 1.	Basel, Switzerland-ah a piang a, kum riat mi chauh a nih lai aṭangin tennis a khel ṭan. 2.	A naupan lai chuan Stefan Edberg, Boris Becker leh Pete Sampras te a ngaisang. 3.	Kum 1993-94 khan a pianna khua Basel Open-ah ballboy a ni a, he inelnaah hian a hnuah vawi 10 a champion, match 75-ah hnehna a chang. 4.	Tennis chauh a ni lo, football a en ṭhin. FC Basel chu a club ṭan ber a ni. 5.	A nupui Mirka Vavrinec pawh tennis player tho a ni, an ram mi niin 2000 Sydney Olympics an khelh aṭangin an inngaizawng. 2002 Hopman Cup-ah an ram tan mixed doubles an khel dun. 6.	Fa pali an nei tawh, phir ve vein vawi hnih an nei. Myla & Charlene bakah Leo & Lenny te an ni. 6.	Federer-a nu Lynette hi South African mi a ni a, a pa Robert hi Swiss mi a ni thung; unaunu Diana a nei bawk. 7.	Tennis khelh bakah chhungkuaa hun hman nuam a ti, vur tawlh (skiing) leh hun thawl neih nuam a ti a, beach velah hun a hmang tam. Table tennis a khel ṭhin bawk. 8.	Kum 2020 February 7 khan Rafael Nadal nen Cape Town, South Africa-ah exhibition match an khel a, tennis inkhel entu tam ber (51,956) record an siam. 9.	University of Basel chuan 2017 November 24 khan Honorary Doctorate Degree an pe. 10.	English, French, German leh Swiss German ṭawng a hmang thei.
Federer leh Mellung ●	Grand Slam nomawi 20 a chawi, ani aia chawi hnem chu Rafael Nadal (22) leh Novak Djokovic (21) te chauh an ni. ●	Nomawi chi hrang hrang 103 a chawi, Open Era chinah chuan Jimmy Connors (109 titles) dawta champion hnem a ni. ●	Singles match 1251-ah hnehna a chang, Open Era chinah Jimmy Connors (1274) dawtah a awm. ●	A zawna world number 1 ni rei thei ber a ni, chawlh kar 237 chhung pakhatna a zawnin a luah. ●	World number 1 ni thei upa ber a ni, kum 36 leh ni 320 mi ni chungin number 1 a ni thei. ●	Mipa player zingah Wimbledon title la hnem ber (8 titles) a ni. ●	Kum 2017 khan Wimbledon title a la, hemi ṭum hian kum 35 leh ni 342 mi niin Wimbledon mipa champion thei upa ber a ni hial. ●	Tennis a khelh chhungin, singles match 1526 leh doubles match 223 a khel a, hliam leh harsatna vanga khelh zawh theih loh a nei lo. ●	Grand Slam pahnihah a zawna vawi nga champion thei awmchhun a ni. Wimbledon (2003-07) leh US Open (2004-08)-ah te a ni. ●	Tennis player awm tawh zingah a zawna Grand Slam final vawi 10 khel thei awmchhun, major tournament final hi vawi 31 a khel. ●	Grand Slam palite hi season khatah final luh vek vawi thum ngawt a nei, kum 2006, 2007 leh 2009. ●	Grass bikah a zawnin match 65 a chak zawn a, hei hi Open Era record a ni, hard court-ah match 56 a chak zawn bawk. ●	Grass, hard leh clay court-ah nomawi 10 chawi tling vek thei awmchhun a ni. ●	Kum 2003-05 inkar khan a zawnin ATP Tour final a khelh 24-ah hnehna a chang vek. ●	World Tour Finals-ah vawi ruk a champion, ani aia champion hnem an awm lo.
Duhtak Roger, ka ṭhianpa leh elpui ni bawk. Tun hun hi thleng ngai lo se ka duh ngei mai. A nihna takah chuan ka tan ni lungngaih thlak tak a ni a, infiamna bakah khawvel pumpui tan ni duhawm lo a ni. "Nang nena tennis kan khelh dunte kha, ka tan chuan inelna chuh ni loin chawimawina leh thil hlu tak a ni, tennis court chhung leh pawnah hun chhinchhiah tlak tak min siamsak.&nbsp;"Nakin zelah hun kan la hman dun ka beisei, tih hmabak tam tak kan nei tih pawh i hriat kha. Tun dinhmunah chuan, i nupui Mirka leh i fate nen hlim taka awm turin ka duhsak che u, London khawpuiah kan inhmu dawn nia,"&nbsp;- Rafael Nadal
Roger Federer 	24 Years 	1526 Single Matches 	1,251 Wins 	310 Number 1 	103 Nomawi 	 Grand Slam Title 	0 Match khelh zawh loh
Roger Federer a chawlh thu kan hriat rualin hming pakhat rilrua rawn lang nghal a awm, a hming chu Rafael Nadal a ni. Federer leh Nadal te hian vanglai an hmang rual a, inelna hmuhnawm leh ropui an chhawp chhuak ṭhin.&nbsp;Anni pahnih hi tennis court chhungah chuan hmelma an ni a,&nbsp;a pawn lamah erawh ṭhian ṭha tak an ni thung. Nadal-a'n an&nbsp;rama tennis academy a dinte chu Federer hian a thlawp&nbsp;hle a, inkhelhna bakah hmun dangah hun an hmang&nbsp;ho fo a ni.
Tennis player ropui bik Roger Federer-a'n tennis a chawlhsan dawn a, a chawlh tur thu a sawi hian khawvel a deng chhuak hneh hle. September 23-25 chhungin Laver Cup an khel dawn a, London khawpuia inelna an hman hi Federer hun hnuhnung tur&nbsp;a ni ang.