Djokovic thlavang hauhtu Thiem

Tennis inelna Adria Tour a buatsaih aṭanga Covid-19 kai an awm avangin Novak Djokovic chuan dem a hlawh a, hetih lai hian Dominic Thiem erawhin world number 1 hi a dem ve lo.

Adria Tour aṭang hian Djokovic te nupa bakah Grigor Dimitrov, Borna Coric leh Viktor Troicki te chuan Covid-19 an kai. Hripui an kai lakah fihlim leh tawh mah se mimal tennis court-ah pawh an la inlan lo thung. Thiem chuan, "Novak hi dem vak vakna tur a awm ka hre lo. Serbia leh Croatia-ah inelna kha neih a ni a, heng ramah te hian khawvel hmun dang angin inkharkhipna kalpui a ni ve lem lo.

"Tournament khel tur khan tumah tihluih kan ni lo a, mahni duhthu a tel vek kan ni. Dan zawm loh leh bawhchhiat a nei lo, mahni awm hmun aṭanga midang dinhmun lo teh ngawt hi chu a fuh loh chang a awm," a ti. Player zingah hri kai an awm avangin inelna hi tihtawp zui nghal a ni a, inlan zingah hian Thiem leh Alexander Zverev te erawhin hri an kai lo. Player ho hian tennis bakah basketball an khel ho a, an inelna hi a hmuna entu an awm bakah social distancing an vawng lem lo.

An thil tih avang hian dem chu an hlawh ngei a, a demtu lam pawhin an ngaihdan an sawi hi a mak lo. Amaherawhchu Serbia ramah inkharkhip a nih miau loh avangin Djokovic hian thiam lohna chu a nei hran lo a ni.