Venghnuai leh Chhinga Veng an inhnehtawk

Zote Honda MPL9-ah player 10-a khel FC Venghnuai leh Chhinga Veng te 1-1 in an inhnehtawk. Chhingcows-in hneh loh an la tawng lo a, Venghnuaiin chak an la nei lo thung.

Nimin RG Stadium-a inkhelah first half-ah goal a lut lo a, second half-ah Venghnuai defender Lalnunsiama'n an lama a tihluh hmangin Chhinga Vengin an khung hmasa. Venghnuaiin substitute C. Ngurnuntluanga hmangin si phurh sut mah se captain VL Thanga hnawhchhuah a ni a, goal a luh belh lo.

A goal lo
Venghnuai leh Chhinga Veng an inkhel tawk a, an fimkhur avangin chance ṭha hmuh tur a awm meuh lo. Box pawn aṭangin chance an insiam a, goal zawna pet an harsat.

Venghnuai captain VL Thanga'n ball pe chhuak mah se chance a insiam chawp thei a, a hun ṭha neih hmasak goal zawnah pet loin vawi hnihnaah goal kham chung a pet per.

Chhinga Veng pawhin Lalrinpuia hmangin chance an nei a, Farkawn tlangval Rinpuia hian goal-ah ṭha zetin pet mah se man of the match-a thlan Joel Lalramchhana'n a dansak.

Goal 2 leh red card
Venghnuaiin second half ṭan tirhah C. Nuna leh C. Ramdinmawia te an luhtir a, an khel ṭha sawt. Rindika hote game a nung a, goal khung hmasa zawk erawh Chhinga Veng an ni thung.

Minute 63-naah Chhingcows right back Laltluangliana cross chu Venghnuai defender Lalnunsiama'n an lamah a tauh lut. Venghnuai an hnual phah lo a, minute hnih hnu lekah C. Ramdina vawrh luh chu C. Nuna'n a tauh goal.

Inkhel a nung chhunzawm a, goal hmuh tur a awm lo. Minute 81-naah Venghnuai captain Thanga'n Chhingcows midfielder Thangkhuma a tlawh avangin hnawhchhuah a ni.

Venghnuaiin player 10-a khel chungin inkhel an thunun hret a, Chhingcows-in hliam vanga TK-a an chhawr theih zui loh avangin an tamna an hmang ṭangkai lo.

Coach thukhawchang
FC Vengnuai coach Rindika Hmar chuan, "Inkhel thlak danglam tura substitution siam ka tum lai takin Thanga'n red card a hmu a, pawi takzet. Chak loh ai chuan point khat chu a ṭha zawk a, result chhia a ni lo," tiin Vanglaini a hrilh. Thanga hian 'direct red card' a hmuh avangin match hnih a khel thei dawn lo.

Chhinga Veng coach Lalremruata chuan, "Kan kim lo a, player ṭhenkhat harsatna dang vanga squad-a kan dah loh avangin player siksawi a harsa. Point thum duh mah ila, point khatah kan lungawi a ṭul," tiin a sawi ve bawk.

Round 3 - September 16, Zirtawpni
FC Venghnuai 1 - 1 Chhinga Veng FC
FCV : C. Ngurnuntluanga 65'
CVFC : Lalnunsiama 63'
MoM : Joel B. Lalramchhana, FCV